قۇلسارىداعى ءۇش كوپقاباتتى ءۇيدىڭ تۇرعىندارى سۋ باسقان جەرتولەلەردە پايدا بولعان جىلاندارعا شاعىمدانۋدا. ادامدار بالالارىنان قاۋىپتەنىپ، ماسەلەنى شەشۋدى تالاپ ەتۋدە، دەپ حابارلايدى infohub.kz سايتى.
قۇلسارىداعى «اتىراۋ» شاعىن اۋدانىنداعى 100 پاتەرلى ءۇش ءۇيدىڭ تۇرعىندارى جەرتولەلەردە باۋىرىمەن جورعالاۋشىلاردى بايقاي باستاعانىن ايتتى. ولاردىڭ سوزىنشە، وتكەن جىلعى سۋ تاسقىنىنان كەيىن ءۇي-جايلار ءالى كۇنگە دەيىن ىلعالدى، بۇل جىلانداردى تارتقان.
ۇيلەر 2023 جىلدىڭ جەلتوقسانىندا كوپبالالى وتباسىلارعا بەرىلگەن بولاتىن. 2024 جىلدىڭ كوكتەمىندە عيماراتتار اۋقىمدى سۋ تاسقىنى ايماعىنا ىلىكتى. تۇرعىندار ەكى ايعا جۋىق پاتەرلەرىنە كىرە الماي، قايىقپەن ءجۇردى. سۋ قايتقاننان كەيىن جەرتولەلەر تازارتىلدى، الايدا ىلعالدىلىق ساقتالعان.
«مىنە، ءقازىر جەرتولە قانداي كۇيدە – ونى قايتادان سۋ باسىپ كەتتى. الدىمەن ساسىق ءيىس پايدا بولدى، سودان كەيىن تىشقاندار ءوربىدى. ەندى جىلاندار پايدا بولدى، ءبىز كۇن سايىن ۇرەيمەن ءومىر ءسۇرىپ جاتىرمىز. تۇندە ۇيىقتامايمىز، بالالارىمىزدان قورقامىز. ەگەر بىرەۋدى جىلان شاعىپ السا، كىم جاۋاپ بەرەدى؟» – دەدى ءۇي تۇرعىنى گۇلناز قاشاباەۆا.
تۇرعىنداردىڭ ايتۋىنشا، ءبىر جىلاندى سۋرەتكە ءتۇسىرۋ مۇمكىن بولعان. ولار جەرتولەدە باسقا دا باۋىرىمەن جورعالاۋشىلار بولۋى مۇمكىن دەپ ەسەپتەيدى، سوندىقتان ولاردىڭ پايدا بولۋ سەبەبىن جويۋدى سۇرايدى.
ۇيلەر جالدامالى تۇرعىن ءۇي بولىپ تابىلاتىندىقتان جانە اۋداندىق تكش ءبولىمىنىڭ بالانسىندا تۇرعاندىقتان، تۇرعىندار جەرتولەلەردى رەتكە كەلتىرۋ كەرەك دەپ سانايدى.
اۋداندىق تكش ءبولىمىنىڭ باسشىسى ارمان ءابدولوۆ تۇرعىنداردىڭ وتىنىشىنەن كەيىن وقيعا ورنىنا تج قىزمەتكەرلەرى بارىپ، تابىلعان جىلاندى جويعانىن حابارلادى.
«جەرتولەلەر تۇرعىنداردىڭ ورتاق مۇلكىنە جاتادى، سوندىقتان ولاردى كۇتىپ ۇستاۋ جانە تازالاۋ – تۇرعىنداردىڭ مىندەتى»، – دەپ ءتۇسىندىردى ارمان ءابدولوۆ.
ازىرگە تاراپتار ماسەلەنى كىم شەشۋى كەرەك دەگەن ورتاق پىكىرگە كەلگەن جوق. تۇرعىندار ماسەلە شەشىلمەيىنشە، جەرتولەلەردە جاڭا جىلاندار پايدا بولۋى مۇمكىن دەپ قاۋىپتەنەدى.