اقمولا وبلىسىنداعى باتپاككول كولىندە قۇتقارۋشىلار ماس كۇيىندە قامىس اراسىنا كىرىپ، ءوزى شىعا الماي قالعان ەر ادامدى سۋدان شىعارىپ الدى. بۇل تۋرالى infohub.kz حابارلايدى.
وقيعا تۋرالى حابار 112 قىزمەتىنە تۇسكەن. قايىقتا بولعان ەر ادام قامىس جاقتان كومەك سۇراعان داۋىستى ەستىپ، بۇل تۋرالى قۇتقارۋشىلارعا حابارلاعان.
تجم مالىمەتىنشە، 1990 جىلى تۋعان ەر ادامعا كومەك قاجەت بولعان. «ەر ادام ماس كۇيىندە قامىس اراسىنا كىرىپ، ءوز بەتىمەن شىعا الماي قالدى»، — دەپ حابارلادى ۆەدومستۆودان.
قۇتقارۋشىلار ونى سۋدان جەدەل الىپ شىعىپ، جاعاعا جەتكىزىپ، جەدەل جاردەم بريگاداسىنا تاپسىردى.
تجم سۋ جاعاسىندا الكوگولدى ىشىمدىك ءىشۋدىڭ قايعىلى سالدارعا اكەلەتىنىن ەسكەرتتى. «ماس كۇيىندە سۋعا تۇسپەڭىزدەر. الكوگول زەيىندى تومەندەتىپ، رەاكسيا جىلدامدىعىن باياۋلاتادى، سۋداعى جازاتايىم وقيعالاردىڭ ءقاۋپىن ەداۋىر ارتتىرادى. قاۋىپسىزدىك ەرەجەلەرىن ساقتاپ، سۋ جاعاسىندا جاۋاپكەرشىلىكپەن دەمالۋعا شاقىرامىز»، — دەلىنگەن ۆەدومستۆو مالىمدەمەسىندە.