الماتىدا 15 قىركۇيەك پەن 25 قازان ارالىعىندا كەمىرگىشتەردى جويۋ بويىنشا اۋقىمدى ءىس-شارالار وتەدى، دەپ حابارلايدى infohub.kz سايتى.
الماتى اكىمدىگىنىڭ ءباسپاسوز قىزمەتىنىڭ مالىمەتىنشە، وڭدەۋ جالپى اۋدانى 47 330 گەكتاردى قۇرايتىن ورتاق پايدالانۋ ايماقتارىن، ونىڭ ىشىندە وزەندەر مەن سۋ قويمالارىنىڭ جاعالاۋلارىن، سونداي-اق جەكە تۇرعىن ءۇي قۇرىلىسى ۋچاسكەلەرىن قامتيدى.
ۆەدومستۆو مەنشىك يەلەرى مەن باسقارۋ ورگاندارى (وسي، كسك)، جەكە ءۇي يەلەرى مەن زاڭدى تۇلعالار ءوز نىساندارىندا دەراتيزاسيانى ءوز بەتىنشە ۇيىمداستىرۋعا مىندەتتى ەكەنىن اتاپ ءوتتى. بۇل كونتەينەر الاڭدارىنا، ساۋدا جانە قوعامدىق تاماقتانۋ نىساندارىنا، كافەلەرگە، مەيرامحانالارعا جانە ساۋدا-ويىن-ساۋىق ورتالىقتارىنا قاتىستى.
قولدانىستاعى زاڭناماعا سايكەس، جەكە جانە زاڭدى تۇلعالار وزدەرىنە تيەسىلى نىساندار مەن اۋماقتاردا دەراتيزاسيانى ءوز قاراجاتى ەسەبىنەن جۇرگىزەدى، دەپ اتاپ ءوتتى ءباسپاسوز قىزمەتىندە.
اكىمدىك قالالىق جانە جەكە اۋماقتاردى ءبىر مەزگىلدە وڭدەۋ دەراتيزاسيانىڭ تيىمدىلىگىن ارتتىرۋعا جانە كەمىرگىشتەردىڭ قايتا تارالۋىن بولدىرماۋعا مۇمكىندىك بەرەتىنىن ەسكە سالدى.
بۇعان دەيىن، تامىز ايىندا، الماتى تۇرعىندارى ەسەنتاي وزەنىنىڭ جاڭا جاعالاۋىندا ەگەۋقۇيرىقتاردىڭ جاپپاي كوبەيۋىنە شاعىمدانعان بولاتىن.