قىرعىزستان پارلامەنتى پرەزيدەنتتىك سايلاۋدى تاعايىنداۋ تۋرالى شەشىمدى قاشان قابىلدايتىنى بەلگىلى بولدى، دەپ حابارلايدى infohub.kz سايتى.
24.kg باسىلىمىنىڭ بيلىكتەگى دەرەككوزگە سىلتەمە جاساپ حابارلاۋىنشا، جوگوركۋ كەنەشتىڭ قىركۇيەكتىڭ العاشقى اپتالارىنا ارنالعان الدىن الا جۇمىس كەستەسى قالىپتاستىرىلعان. وسىعان وراي، العاشقى وتىرىس 2 قىركۇيەكتە ءوتۋى ءتيىس. 9 قىركۇيەكتە مينيسترلەر كابينەتىنىڭ كەيبىر مۇشەلەرى انت بەرەدى. ال قىرعىزستان پرەزيدەنتىنىڭ كەزەكتى سايلاۋىن تاعايىنداۋ تۋرالى قاۋلىنى پارلامەنت كەزەكتەن تىس ەمەس، كادىمگى وتىرىستا 17 قىركۇيەكتە قابىلداۋدى جوسپارلاپ وتىر.
دەرەككوزدىڭ ايتۋىنشا، بۇل مەرزىم زاڭناما تالاپتارىنا سايكەس كەلەدى، وعان سايكەس جوگوركۋ كەنەش سايلاۋ كۇنىنە كەمىندە ءتورت اي قالعاندا سايلاۋ تاعايىنداۋ تۋرالى شەشىم قابىلداۋى ءتيىس.
بۇعان دەيىن قىرعىزستانداعى كەزەكتى پرەزيدەنتتىك سايلاۋ 2027 جىلدىڭ 27 قاڭتارىندا وتەتىنى بەلگىلى بولعان.
ايتا كەتەيىك، ەل پرەزيدەنتى سادىر جاپاروۆ بۇعان دەيىن ۇقك بۇرىنعى باسشىسى كامچىبەك تاشيەۆتى بولاشاق مەملەكەت باسشىسى رەتىندە قاراستىرعانىن جانە 2027 جىلعى سايلاۋعا ءوز كانديداتۋراسىن قويۋدى ويلاماعانىن مالىمدەگەن ەدى. ال جاقىندا قىرعىزستان باسشىسى 2027 جىلدىڭ قاڭتارىندا وتەتىن ەل پرەزيدەنتتىگىنە سايلاۋعا قاتىساتىنىن رەسمي راستادى.