قىرعىزستان شانحاي ىنتىماقتاستىق ۇيىمى (شىۇ) ءسامميتى مەن دۇنيەجۇزىلىك كوشپەندىلەر ويىندارى سياقتى ەكى ءىرى حالىقارالىق ءىس-شارا قارساڭىندا قاۋىپسىزدىكتى قامتاماسىز ەتۋ بويىنشا شۇعىل شارالار قابىلدادى، دەپ حابارلايدى infohub.kz سايتى.
NUR.KZ 24kg-كە سىلتەمە جاساپ حابارلاعانداي، قىرعىزستان قاۋىپسىزدىك كەڭەسىنىڭ حاتشىسى اديلەت وروزبەكوۆ ۇيلەستىرۋ شتابىنىڭ وتىرىسىن وتكىزىپ، وندا وسى ءىس-شارالاردى دايىنداۋ جانە وتكىزۋ ماسەلەلەرى تالقىلاندى. كەزدەسۋ بارىسىندا ىشكى ىستەر مينيسترلىگى، ۇلتتىق قاۋىپسىزدىك مەملەكەتتىك كوميتەتى، توتەنشە جاعدايلار مينيسترلىگى، دەنساۋلىق ساقتاۋ مينيسترلىگى جانە باسقا دا ۆەدومستۆولار مەن جەرگىلىكتى بيلىك وكىلدەرى قابىلدانىپ جاتقان شارالار تۋرالى باياندادى.
سامميت پەن ويىندار كەزىندە كوشەلەر مەن تراسسالارداعى قوزعالىستىڭ ۋاقىتشا شەكتەۋلەرى تۋرالى حالىقتى حاباردار ەتۋگە ەرەكشە نازار اۋدارىلدى. اديلەت وروزبەكوۆ الداعى ءىس-شارالاردىڭ اۋقىمى، مەملەكەت باسشىلارىنىڭ، شەتەلدىك دەلەگاسيالار مەن قوناقتاردىڭ سانى جاعىنان ەل تاريحىندا تەڭدەسى جوق ەكەنىن اتاپ ءوتتى.
كەڭەس قورىتىندىسى بويىنشا مەملەكەتتىك ورگاندار مەن جەرگىلىكتى بيلىككە تەرروريزمگە قارسى، قوعامدىق جانە جول قاۋىپسىزدىگىن قامتاماسىز ەتۋ بويىنشا قوسىمشا شارالار قابىلداۋ تاپسىرىلدى. سونداي-اق سانيتارلىق-ەپيدەميولوگيالىق باقىلاۋ كۇشەيتىلىپ، توتەنشە جاعدايلار قىزمەتتەرىنىڭ دايىندىعى قامتاماسىز ەتىلدى.
دۇنيەجۇزىلىك كوشپەندىلەر ويىندارى 31 تامىز بەن 6 قىركۇيەك ارالىعىندا وتەدى. جارىستار التىنشى رەت ۇيىمداستىرىلادى، وعان الەمنىڭ 100-دەن استام ەلىنەن 3 مىڭعا جۋىق سپورتشى قاتىسادى دەپ كۇتىلۋدە. شىۇ-عا مۇشە ەلدەر باسشىلارىنىڭ ءسامميتى 30 تامىز بەن 1 قىركۇيەك ارالىعىندا بىشكەكتە وتەدى دەپ جوسپارلانۋدا. ۇيىم قۇرامىنا قازاقستاندى قوسا العاندا 10 ەل كىرەدى.