قىرعىزستان مەن وزبەكستان ەكى ەلدى مەكەندى وزبەكستان قۇرامىنان قىرعىزستانعا رەسمي بەرۋ بويىنشا ۇيىمداستىرۋ-تەحنيكالىق جۇمىستاردى باستادى، دەپ حابارلايدى infohub.kz سايتى.
24.kg باسىلىمى قىرعىزستان پرەزيدەنتىنىڭ باتكەن وبلىسىنداعى وكىلدىگىنە سىلتەمە جاساپ، بۇرىن وزبەكستاننىڭ فەرعانا وبلىسىنا قاراعان چوڭ-گارا جانە ءتاش-دوبو اۋىلدارىن رەسمي بەرۋ جۇمىستارى مەملەكەتتىك شەكارانى دەماركاسيالاۋ جانە جەر ۋچاسكەلەرىمەن الماسۋ تۋرالى كەلىسىمدەر اياسىندا جۇرگىزىلىپ جاتقانىن حابارلادى.
شىلدە ايىندا ەكى ەلدىڭ بىرلەسكەن جۇمىس كوميسسياسىنىڭ كەزەكتى وتىرىسىندا بەرىلەتىن اۋماقتار تۇرعىندارىنىڭ ازاماتتىق مارتەبەسى، كوشىرۋ، م ۇلىك، شارۋاشىلىق قىزمەت جانە باسقا دا ۇيىمداستىرۋ ماسەلەلەرى تالقىلاندى.
كەشە، 3 تامىزدا، بىرلەسكەن جۇمىس توبى تىكەلەي اۋىلداردا جۇمىس ىستەي باستادى. ماماندار تۇرعىنداردى تىركەۋدەن وتكىزىپ، قۇجاتتاردى ودان ءارى رەسىمدەۋ ءتارتىبىن تۇسىندىرۋدە.
چوڭ-گارا جانە ءتاش-دوبو اۋىلدارىندا نەگىزىنەن ەتنيكالىق قىرعىزدار تۇراتىنى اتاپ وتىلەدى. الدىن الا مالىمەتتەر بويىنشا، ەكى ەلدى مەكەننىڭ حالقى شامامەن 2،5 مىڭ ادامدى قۇرايدى.
تىركەۋ اياقتالعاننان كەيىن زاڭنامادا كوزدەلگەن تۇرعىندارعا قىرعىزستان ازاماتتىعىن بەرۋ ءراسىمى باستالادى.
ونىڭ ورنىنا قىرعىز تاراپى وزبەكستانعا اۋدانى بويىنشا بالامالى جەر ۋچاسكەلەرىن بەرەدى.
ەسكە سالايىق، بۇعان دەيىن قىرعىزستان وزبەكستانمەن اۋماق الماسۋدان كەيىن ەكى اۋىلدىڭ ەل قۇرامىنا وتكەنىن حابارلاعان بولاتىن. سونداي-اق بىشكەك قازاقستانعا دا وسىنداي ۇسىنىس جولدادى.