قىرعىزستانداعى انومالدى ىستىق ەلەكتر ەنەرگياسىن تۇتىنۋدىڭ كۇرت وسۋىنە سەبەپ بولدى. ونىڭ سالدارىنان بىشكەك پەن شۋ وبلىسىنىڭ كەيبىر اۋداندارىندا ەلەكتر قۋاتى ۋاقىتشا ءوشىرىلدى، دەپ حابارلايدى infohub.kz سايتى قىرعىزدىڭ 24.kg باسىلىمىنا سىلتەمە جاساپ.
قىرعىزستاننىڭ ۇلتتىق ەلەكتر جەلىسىنىڭ حابارلاۋىنشا، ورتالىق ازياداعى، سونىڭ ىشىندە قىرعىزستانداعى تىم جوعارى تەمپەراتۋرا سالدارىنان ەنەرگوجۇيەگە تۇسكەن جۇكتەمە رەكوردتىق دەڭگەيگە جەتتى. ەلەكتر جەلىلەرىنىڭ جابدىقتارى شاماسىنىڭ شەگىندە جۇمىس ىستەپ تۇر، ال كەيبىر ەلەكتر بەرۋ جەلىلەرى بەلگىلەنگەن نورمادان اسىپ كەتكەن.
اپاتتار مەن اۋقىمدى وشىرۋلەردى بولدىرماۋ ءۇشىن ەنەرگەتيكتەر رەتتەۋ شارالارىن جۇرگىزۋدە. كەيبىر اۋدانداردا ەلەكتر قۋاتىن بەرۋدە ەكى ساعاتقا دەيىنگى ۋاقىتشا ۇزىلىستەر بولۋى مۇمكىن.
ۇلتتىق ەلەكتر جەلىسى شەكتەۋلەردىڭ ۋاقىتشا ەكەنىن، جابدىقتى قورعاۋ، جۇيەلىك اقاۋلاردىڭ الدىن الۋ جانە ەلەكترمەن جابدىقتاۋ تۇراقتىلىعىن ساقتاۋ ءۇشىن قاجەت ەكەنىن اتاپ ءوتتى.