قاتارىنان توعىزىنشى اي بويى تومەندەپ وتىرعانىنا قاراماستان، جۇڭگو اۆتورىنقى پارادوكسالدى ديناميكا كورسەتۋدە: ىشكى ساتۋ كۇرت قۇلدىرادى، ال ەكسپورت رەكوردتىق كورسەتكىشتەرگە جەتتى. 2026 جىلدىڭ ماۋسىم ايىندا قىتايدا جاڭا جەڭىل اۆتوكولىكتەردىڭ ساتۋ كولەمى وتكەن جىلدىڭ سايكەس كەزەڭىمەن سالىستىرعاندا 23،4%-عا تومەندەپ، 1،62 ميلليون دانانى قۇرادى، دەپ حابارلايدى infohub.kz سايتى.
تومەندەۋ قاتارىنان توعىز ايعا سوزىلدى: مامىر ايىندا تومەندەۋ 22،3% دەڭگەيىندە بولدى. ءبىرىنشى جارتىجىلدىقتىڭ قورىتىندىسى بويىنشا ساتۋ كولەمى 20،4%-عا تومەندەپ، 8،8 ميلليون كولىككە جەتتى. نەگىزگى سەبەپتەر رەتىندە تۇتىنۋشىلىق سۇرانىستىڭ السىزدىگى، ەكونوميكالىق بەلگىسىزدىك جانە مەملەكەتتىك سۋبسيديالاردىڭ قىسقارۋى اتالادى. اسىرەسە ارزان بەنزيندى اۆتوموبيلدەر سەگمەنتى (34%-عا تومەندەۋ) جانە ەلەكتروموبيلدەر (43%-عا كەمۋ) قاتتى زارداپ شەكتى.
سونىمەن قاتار جۇڭگو اۆتوموبيلدەرىنىڭ ەكسپورتى رەكوردتىق قارقىنمەن ءوسىپ كەلەدى. ماۋسىم ايىندا شەتەلگە 882 مىڭ كولىك جونەلتىلدى (2025 جىلدىڭ ماۋسىمىنا 82،1%-عا ارتىق)، ال 2026 جىلدىڭ التى ايىندا 4،28 ميلليون اۆتوموبيل ەكسپورتتالدى (+70،6%). نەگىزگى باعىتتار – ەۋروپا، وڭتۇستىك-شىعىس ازيا جانە لاتىن امەريكاسى. شەتەلدىك جەتكىزىلىمدەر ىشكى سۇرانىستىڭ السىزدىگىن وتەۋگە كومەكتەسۋدە.
پرەميالدى سەگمەنت تۇراقتىراق بولىپ شىقتى: داۋلەتتى قىتايلىقتار قىمبات ءارى تەحنولوگيالىق مودەلدەرگە اۋىسۋدا، بۇل جەرگىلىكتى برەندتەردىڭ پوزيسياسىن نىعايتادى. بۇعان دەيىن BMW، Mercedes، Audi جانە Volkswagen سياقتى شەتەلدىك ماركالاردىڭ قىتايداعى ساتىپ الۋشىلارىن جوعالتىپ جاتقانى حابارلانعان بولاتىن.