قىتايلىق «Urumqi Airlines» اۋەكومپانياسى قازاقستاننىڭ كولىك مينيسترلىگىمەن زايسان مەن كاتون-قاراعايعا رەيس اشۋ ماسەلەسىن تالقىلاپ جاتىر، دەپ حابارلايدى infohub.kz سايتى.
ازىرگە ءۇرىمشى – قاراعاندى، قۇلجا (يني) – استانا جانە قۇلجا (يني) – الماتى باعىتتارى بويىنشا تۇراقتى رەيستەر اشۋ تۋرالى ءسوز بولىپ وتىر، دەپ حابارلايدى كولىك مينيسترلىگىنىڭ ءباسپاسوز قىزمەتى. الايدا بولاشاقتا تاراپتار باسقا دا باعىتتاردى تالقىلاۋدا. مىسالى، «Urumqi Airlines» وسكەمەن مەن سەمەيگە ۇشا باستاۋى مۇمكىن، سونداي-اق شىعىس قازاقستان وبلىسىنا، اتاپ ايتقاندا كاتون-قاراعايعا رەيس اشۋى ىقتيمال. تاعى ءبىر تۋريستىك باعىت — قىتايمەن شەكارادا ورنالاسقان زايسان.
كاتون-قاراعاي تۋريستەردى دەمالىستىڭ ءارتۇرلى تۇرلەرىمەن تارتادى. بۇقتىرما سۋ قويماسىندا شومىلۋعا، ايگىلى ەمدىك راحمان بۇلاقتارىنا بارۋعا، التاي تاۋلارىندا ترەكينگ جاساۋعا نەمەسە شاتقالدارداعى كورىكتى جولدارمەن كولىكپەن ساياحاتتاۋعا بولادى.
اباي وبلىسىنداعى زايسان قالاسىنىڭ ماڭىندا اتتاس كول، سونداي-اق عاجايىپ مارس پەيزاجدارىمەن تانىمال كيىن-كەرىش شاتقالى ورنالاسقان.
«Urumqi Airlines» اۋەكومپانياسى بۇعان دەيىن تەك جۇڭگو ىشىندەگى رەيستەرگە قىزمەت كورسەتكەن. سىرتقا شىعار العاشقى حالىقارالىق باعىت قازاقستان بولۋى مۇمكىن.
بۇعان دەيىن Kursiv LifeStyle ەلىمىزدىڭ قاي قالالارىنان تۇركياعا ءجيى ۇشا الاتىنىن جازعان.