قىزىلوردادا سوتتار كامەلەتكە تولماعان بالالارى بار ايەلدى جىلىتۋ ماۋسىمىندا جالدامالى پاتەردەن شىعارۋدان قورعادى. اتقارۋشىلىق ءىس جۇرگىزۋ سۋىق اياقتالعانشا توقتاتىلدى. بۇل شەشىمدى بارلىق سوت ينستانسيالارى ماقۇلدادى، دەپ حابارلايدى NUR.KZ.
ءىس ماتەريالدارىنا سايكەس، قىزىلوردادا ايەل مەن ونىڭ بالالارىن جالدامالى تۇرعىن ۇيدەن شىعارۋ تۋرالى اتقارۋشىلىق ءىس جۇرگىزۋ قوزعالعان. مەملەكەتتىك سوت ورىنداۋشىسى جىلىتۋ ماۋسىمى اياقتالعانعا دەيىن توقتاتۋ تۋرالى قاۋلى شىعاردى. بۇعان كەلىسپەي، تالاپكەر — «قازاقستان تۇرعىن ءۇي كومپانياسى» اق — قاۋلىنى زاڭسىز دەپ تانۋدى جانە ونىڭ كۇشىن جويۋدى تالاپ ەتىپ، سوتقا جۇگىندى. تالاپكەر ايەلدىڭ مەنشىك يەسى ەمەس، جالداۋ شارتى بويىنشا تۇراتىنىن ايتتى.
ءبىرىنشى جانە اپەللياسيالىق ساتىداعى سوتتار تالاپتى قاناعاتتاندىرماي، سوت ورىنداۋشىسىنىڭ ارەكەتىن زاڭدى دەپ تانىدى. ءوز شەشىمىن نەگىزدەۋ ءۇشىن ولار بالا قۇقىعى تۋرالى كونۆەنسياعا، بالا مۇددەسىن باسىم قورعاۋ قاجەتتىلىگىنە، سونداي-اق ىزگىلىك، ادىلدىك جانە پاراساتتىلىق قاعيداتتارىنا سىلتەمە جاسادى.
اكىمشىلىك ىستەر جونىندەگى كاسساسيالىق سوت ءمان-جايلاردى زەردەلەي كەلە، اتقارۋشىلىق ءىس جۇرگىزۋدىڭ كامەلەتكە تولماعان بالالارى بار وتباسىنا قاتىستى قوزعالعانىن انىقتادى. زاڭ بويىنشا جىلىتۋ ماۋسىمىندا الەۋمەتتىك وسال ازاماتتاردى، بالالى وتباسىلاردى جانە I نەمەسە II توپ مۇگەدەكتەرىن جالعىز تۇرعىن ۇيدەن شىعارۋعا تىيىم سالىنعان. «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭ مۇنداي ءىس جۇرگىزۋلەردى توقتاتۋدى تىكەلەي مىندەتتەيدى.
كاسساسيا سونداي-اق تاراپتار اراسىندا بۇرىن ساتىپ الۋ قۇقىعىمەن جالداۋ شارتى جاسالعانىن، بۇل وتباسىنىڭ ۇزاق جانە تۇراقتى تۇرعانىن كورسەتەتىنىن اتاپ ءوتتى. ءىس جۇرگىزۋدى توقتاتۋ ۋاقىتشا سيپاتتا، سوت اكتىسىن ورىنداۋعا كەدەرگى كەلتىرمەيدى جانە كامەلەتكە تولماعانداردىڭ قۇقىقتارىن قورعاۋعا باعىتتالعان. ناتيجەسىندە كاسساسيالىق ساتى تومەنگى سوتتاردىڭ شەشىمدەرىن كۇشىندە قالدىردى.