2025 جىلدىڭ قورىتىندىسى بويىنشا قىزىلوردا وبلىسى بۇرىنعى اكىمىنىڭ ورىنباسارى مۇرات يماندوسوۆپەن بايلانىستى «رزا» كومپانياسى 19،3 ملن تەڭگە تازا پايدا تاپتى. ءبىر جىل بۇرىن بۇل كورسەتكىش 20،9 ملن تەڭگەنى قۇراعان ەدى، دەپ حابارلايدى infohub.kz.
كاسىپورىن قىزىلوردا وبلىسىنىڭ قازالى اۋدانىندا تىركەلگەن. نەگىزگى قىزمەت باعىتتارى — قۇرىلىس جانە جول جوندەۋ جۇمىستارى، جول-قۇرىلىس ماتەريالدارىن ءوندىرۋ جانە ساتۋ، جانار-جاعارماي ماتەريالدارىن وتكىزۋ، كولىك-ەكسپەديسيالىق قىزمەتتەر، اۆتوبولشەكتەر ساۋداسى، اۋىل شارۋاشىلىعى جانە سىرتقى ەكونوميكالىق وپەراسيالار.
ەسەپتىلىككە سايكەس، «رزا» كومپانياسىنىڭ نەگىزگى يەسى — بۇرىنعى اكىم ورىنباسارىنىڭ اكەسى، كاسىپكەر سامۋرات يماندوسوۆ. وعان كومپانيا اكسيالارىنىڭ 80%-ى تيەسىلى، قالعان 20%-ى — ونىڭ ۇلى نۇرلان يماندوسوۆكە.
مۇرات يماندوسوۆ بۇرىن ءبىرقاتار مەملەكەتتىك قىزمەتتەر اتقارعان: قازالى جانە قارماقشى اۋداندارىنىڭ اكىمى، قىزىلوردا وبلىسىنىڭ يندۋستريالدى-يننوۆاسيالىق دامۋ باسقارماسىنىڭ باستىعى، سونداي-اق وبلىس اكىمىنىڭ ءوندىرىس، ينۆەستيسيا، كاسىپكەرلىك جانە تۋريزم ماسەلەلەرى جونىندەگى ورىنباسارى بولعان.
ب ا ق دەرەكتەرىنە سۇيەنسەك، يماندوسوۆتار وتباسىنا تۇتاس اگروونەركاسىپتىك كەشەن تيەسىلى: كۇرىش القاپتارى، ءسۇت تاۋارلى فەرماسى، ەت جانە ءسۇت وڭدەۋ سەحتارى، قۇرىلىس كومپانيالارى، جانارماي قۇيۋ ستانسيالارى مەن دۇكەندەر. سامۋراتتىڭ ەكى ۇلى دا كاسىپورىن قىزمەتىنە تارتىلعان.
«رزا» كومپانياسىنىڭ 2025 جىلعى ءتۇسىمى 412،4 ملن تەڭگەنى قۇرادى، ال ءبىر جىل بۇرىن ول 776،8 ملن تەڭگەگە جەتكەن ەدى. وسىلايشا، كاسىپورىننىڭ كىرىسى ەكى ەسەگە جۋىق قىسقارعان.
ءتۇسىمنىڭ تومەندەۋىنە قاراماستان، كومپانيا پايدالىلىعىن ساقتاپ قالدى. سالىق سالىنعانعا دەيىنگى پايدا 25،1 ملن تەڭگەنى، ال كورپوراتيۆتىك تابىس سالىعىن تولەگەننەن كەيىنگى تازا پايدا 19،3 ملن تەڭگەنى قۇرادى.
كاسىپورىننىڭ جالپى پايداسى دا ايتارلىقتاي تومەندەگەن — 513،9 ملن تەڭگەدەن 29،7 ملن تەڭگەگە دەيىن. بۇل وتكىزىلگەن تاۋارلار مەن قىزمەتتەردىڭ وزىندىك قۇنىنىڭ 262،9 ملن تەڭگەدەن 382،7 ملن تەڭگەگە دەيىن وسۋىنە جانە سونىمەن بىرگە ءتۇسىمنىڭ ازايۋىنا بايلانىستى.