قىزىلوردادا «قازاقستاندىق تۇرعىن ءۇي كومپانياسى» (قتۇك) جىلۋ ماۋسىمىندا انانى كامەلەتكە تولماعان بالالارىمەن بىرگە جالدامالى پاتەردەن شىعارۋ ارەكەتى ءساتسىز اياقتالدى، دەپ حابارلايدى infohub.kz سايتى.
مەملەكەتتىك سوت ورىنداۋشىسى قىس اياقتالعانشا شىعارۋ پروسەسىن توقتاتا تۇردى، الايدا قتۇك بۇعان كەلىسپەي، سوتقا اكىمشىلىك تالاپ-ارىز بەردى. كومپانيا سوت ورىنداۋشىسىنىڭ قاۋلىسىن زاڭسىز دەپ تاۋىپ، كۇشىن جويۋدى تالاپ ەتتى جانە ايەل پاتەردىڭ مەنشىك يەسى ەمەس، تەك شارت بويىنشا جالعا الاتىنىن، سوندىقتان كەيىنگە قالدىرۋعا زاڭدى نەگىز جوق دەپ دالەلدەدى.
ءبىرىنشى جانە اپەللياسيالىق ساتىلارداعى سوتتار قتۇك-تىڭ تالابىن قاناعاتتاندىرماي، سوت ورىنداۋشىسىنىڭ ارەكەتتەرىن زاڭدى دەپ تانىدى. شەشىمدەرىندە ولار كومپانيانىڭ تالاپ-ارىزى بالا قۇقىقتارى تۋرالى كونۆەنسيانى، سونداي-اق ىزگىلىك پەن ادىلدىك قاعيداتتارىن بۇزاتىنىن اتاپ ءوتتى.
ءىس كاسساسيالىق سوتقا دەيىن جەتتى. سوت ءىس جۇرگىزۋدىڭ كامەلەتكە تولماعان بالالارى بار وتباسىنا قاتىستى قوزعالعانىن انىقتادى. سونىمەن قاتار، كاسساسيالىق سوت زاڭ بويىنشا جىلۋ ماۋسىمىندا بالالارى بار وتباسىلاردى، مۇگەدەكتىگى بار ادامداردى جانە الەۋمەتتىك وسال توپتاردى جالعىز باسپانادان شىعارۋعا تىيىم سالىنعانىن ەسكە سالدى. سونداي-اق، باستاپقىدا تۇرعىن ءۇي ايەلگە كەيىننەن ساتىپ الۋ قۇقىعىمەن جالعا بەرىلگەنىن ەسكەردى، بۇل وتباسىنىڭ ۇزاق جانە تۇراقتى تۇرۋىن راستايدى.
بۇل رەتتە كاسساسيالىق سوت شىعارۋدى توقتاتا تۇرۋ تۋرالى شەشىم ۋاقىتشا سيپاتقا يە ەكەنىن، سوت ۇكىمىن جويماي، تەك قىسقى كەزەڭدە بالالاردىڭ قۇقىقتارىن قورعايتىنىن اتاپ ءوتتى.
بۇعان دەيىن قازاقستاندا بورىشكەرلەردى باسپانادان شىعارۋ ەرەجەلەرى وزگەرگەنى حابارلانعان بولاتىن.