كەڭەس جانە رەسەيلىك ءانشى لاريسا دولينا 71 جاسقا تولدى. ول Instagram-داعى پاراقشاسىندا جانكۇيەرلەرىنە اشىق حات جاريالاپ، ساحنادان قاشان كەتەتىنى تۋرالى سىنشىلارعا جاۋاپ بەردى، دەپ حابارلايدى infohub.kz سايتى.
ءانشى جەلىدە فوتوسۋرەت جاريالاپ، ءوزىنىڭ سەزىمدەرى مەن ويلارىن اشىق جەتكىزدى. «بۇگىن مەن 71 جاسقا تولىپ وتىرمىن. مىنە، مەن بۇگىن وسىلاي كورىنەمىن. جىلدار قالايشا جىلدام وتە شىقتى... ءبىراق ومىرىمدە سونشاما جاقسىلىق بولدى، بارلىق جاماندىق پەن قورقىنىشتى باستان كەشىرىپ، ونى جەڭىپ، بەتتى اۋدارىپ، ءومىرىمنىڭ جاڭا جىلىنا تاعى دا ءبىر ادەمى ءارى ەستە قالارلىقتاي دۇنيە جاساۋ كەرەك دەگەن سەزىممەن قادام باستىم. ساحنادا تاعى قانشا جۇرەتىنىمدى بىلمەيمىن، ءبارى كوكتە شەشىلەدى... ءبىراق قۇداي قانشا ءومىر بەرسە، سونى قابىلداپ، ءارى قاراي ءومىر سۇرەمىن»، — دەپ جازدى ول.
ءانشى ادامدارعا دەگەن سەنىمىن جوعالتپاعانىن، سوندىقتان ءوزىن باقىتتى سانايتىنىن ايتتى. «مەن باي اداممىن، ءبىراق ماتەريالدىق جاعىنان ەمەس، الاياقتار مەنى ەشتەڭەسىز قالدىرۋعا تىرىستى. مەن دوستارىما، جاقىندارىما، ءوز شىعارماشىلىعىما جانە بارىنە قاراماستان ادامدارعا دەگەن سەنىمگە بايمىن. كوپ نارسەنى ۇيرەندىم جانە ءالى دە ۇيرەنۋدەمىن. مەنىڭ ورنىمدى باساتىن جاڭا بۋىن جۇلدىزدارىنىڭ ءوسىپ كەلە جاتقانىن كورىپ، وعان ءوزىمنىڭ دە قاتىسىم بار ەكەنىن ءبىلۋ — مەن ءۇشىن باقىت (بۇل — مەنىڭ كەتۋىمدى قالايتىندارعا جاۋابىم). مەنىڭ شىعارماشىلىق ءومىرىم وتە باي جانە مەن ءالى كۇنگە دەيىن سۇرانىستامىن (مەنى قارت دەپ، ساحنادا ورنىم جوق دەپ جازاتىندارعا وكىنىشكە وراي)»، — دەپ كەلتىرەدى ونىڭ ءسوزىن NUR.KZ.
ول سونداي-اق ءار وتكەن مينۋتتان ءلاززات الۋعا تىرىساتىنىن ايتتى، سەبەبى بۇرىن دا، ءقازىر دە وپتيميست. «وزىمە نە تىلەيمىن؟ كاسىبي جولىمنىڭ جالعاسۋىن، دەنساۋلىق پەن كۇش-قۋات، جانە سىزدەردىڭ، قىمباتتى جازىلۋشىلارىم، قولداۋلارىڭىزدى»، — دەپ قورىتىندىلادى دولينا.
جانكۇيەرلەر ءانشىنى تۋعان كۇنىمەن قۇتتىقتاپ، كوپتەگەن جىلى لەبىزدەر قالدىردى. ەسكە سالايىق، لاريسا دولينا ءوزىن الداعان الاياقتاردان 144 ملن رۋبلدەن استام قاراجاتتى سوت ارقىلى ءوندىرىپ العان.