قازاقستاندا مەملەكەتتىك جانە جەكە ۇيىمداردىڭ لاتىن قارپىندەگى جازبالارى مەن باننەرلەرىن ورنالاستىرۋعا ۋاقىتشا تىيىم سالىندى. بۇل شەشىم قازاق ءالىپبيىنىڭ لاتىن گرافيكاسىنا نەگىزدەلگەن جاڭا نۇسقاسىنىڭ بەكىتىلۋىن كۇتۋمەن بايلانىستى، دەپ حابارلايدى infohub.kz سايتى.
عىلىم جانە جوعارى ءبىلىم مينيسترلىگى ورتالىق جانە جەرگىلىكتى اتقارۋشى ورگاندارعا مەنشىك نىسانىنا قاراماستان بارلىق ۇيىمداردىڭ لاتىن گرافيكاسىنداعى كورنەكى جانە وزگە دە اقپاراتتارىن جەتىلدىرىلگەن ءالىپبي بەكىتىلگەنگە دەيىن ورنالاستىرۋدى توقتاتا تۇرۋدى ۇسىندى.
قازىرگى ۋاقىتتا ءتىل ءبىلىمى ينستيتۋتىنىڭ، «ءتىل-قازىنا» ۇلتتىق عىلىمي-پراكتيكالىق ورتالىعىنىڭ جانە جوعارى وقۋ ورىندارىنىڭ عالىم-لينگۆيستەرى قازاق ءتىلى ءالىپبيىنىڭ لاتىن گرافيكاسىنا نەگىزدەلگەن جوباسى مەن ەملە ەرەجەلەرىن جەتىلدىرۋدە.
بۇعان دەيىن قازاق ءالىپبيىن لاتىن گرافيكاسىنا كوشىرۋگە بولىنگەن قاراجاتتىڭ نەگىزگى بولىگى جۇمىس جوسپارلارىنىڭ وزگەرۋىنە بايلانىستى بيۋدجەتكە قايتارىلعانى حابارلانعان بولاتىن. جوباعا جانە سيفرلىق قىزمەتتەرگە رەسپۋبليكالىق بيۋدجەتتەن قوسىمشا قاراجات ءالىپبي مەن بارلىق نورماتيۆتىك قۇجاتتار رەسمي بەكىتىلگەننەن كەيىن عانا بولىنەتىن بولادى.