رەسەي سىرتقى ىستەر ءمينيسترى سەرگەي لاۆروۆ بىرىككەن ۇلتتار ۇيىمىنىڭ باس اسسامبلەياسى تريبۋناسىنان سويلەگەن سوزىندە ەۋروپالىق ەلدەردى ۋكرايناداعى قاقتىعىستى بەيبىت جولمەن رەتتەۋگە ادەيى كەدەرگى جاسادى دەپ ايىپتادى. بۇل تۋرالى infohub.kz سايتى حابارلايدى.
رەسەي سىرتقى ساياسي ۆەدومستۆوسى باسشىسىنىڭ ايتۋىنشا، ەۋروپا مەملەكەتتەرى بەيبىت كەلىسسوزدەرگە جول بەرمەۋ جانە ونىڭ پەرسپەكتيۆالارىن السىرەتۋ ءۇشىن قولدان كەلگەننىڭ ءبارىن جاساپ جاتىر. بۇل كەلىسسوزدەرگە كوپتەگەن تاراپ، سونىڭ ىشىندە ترامپ اكىمشىلىگى دە مۇددەلى.
«ەۋروپادا بەيبىت رەتتەۋگە كەدەرگى جاساۋ جانە كوپشىلىك، سونىڭ ىشىندە ترامپ اكىمشىلىگى مۇددەلى كەلىسسوزدەردىڭ پەرسپەكتيۆالارىن بۇزۋ ءۇشىن ءبارىن جاساپ جاتىر»، — دەدى لاۆروۆ.
مينيستر سونداي-اق ەۋروپالىق ەلدەر رەسەيدى تەجەۋ دەپ اتاعان «ۋتوپيالىق ماقسات» ءۇشىن ەۋروپالىق قاۋىپسىزدىك جۇيەسىن قيراتىپ جاتقانىن اتاپ ءوتتى.
سونىمەن قاتار، لاۆروۆ باتىستىڭ ءوز كۇش-جىگەرىنىڭ بوس ەكەنىن تۇسىنە وتىرىپ، شيەلەنىستى ودان ءارى ۋشىقتىرۋ ساياساتىن جالعاستىرىپ جاتقانىن ايتتى: ۋكرايناعا قارۋ-جاراق جەتكىزىپ، ازاماتتىق ينفراقۇرىلىم مەن بەيبىت تۇرعىندارعا سوققى بەرۋگە جاردەمدەسۋدە.
«باتىستا رەسەيگە ستراتەگيالىق جەڭىلىس جاساۋدى ارماندايدى، ءبىراق بۇل ارماندار، بۇرىن كوپ رەت بولعانداي، سوعىس تۇتاندىرۋشىلاردىڭ وزدەرىن ستراتەگيالىق تۇيىققا اكەلەدى»، — دەپ ەسكەرتتى ديپلومات.
ەسكە سالايىق، بۇعان دەيىن رەسەي فەدەراسياسى پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆ ۋكراينا مەن امەريكا قۇراما شتاتتارىنىڭ قاتىسۋىمەن ءۇشجاقتى كەلىسسوزدەر جاقىن ارادا ءوتۋى مۇمكىن ەكەنىن مالىمدەگەن بولاتىن.