رەسەي سىرتقى ىستەر ءمينيسترى سەرگەي لاۆروۆ ماسكەۋدىڭ ۋكرايناداعى جانجالدى رەتتەۋ بويىنشا كەلىسسوزدەردىڭ جاڭا كەزەڭىنە دايىن ەكەنىن مالىمدەدى. بۇل تۋرالى رەسەيلىك سىرتقى ساياسي ۆەدومستۆو باسشىسى ۋكراينا توڭىرەگىندەگى احۋالعا ارنالعان دوڭگەلەك ۇستەلدە سويلەگەن سوزىندە حابارلادى، دەپ جازادى infohub.kz سايتى.
«ءبىز كەلىسسوزدەردەن ەشقاشان باس تارتپاعانىمىزدى تۇسىندىردىك. وتكەن بارلىق كەلىسسوزدەر ءبىزدىڭ باستامامىزبەن ۇزىلگەن جوق. سوندىقتان ارىپتەستەرىمىز دايىن بولسا، مۇنى قايتا جالعاستىرۋعا ابدەن بولادى دەپ ويلايمىن. ايتارىمىز بار»، — دەپ كەلتىرەدى ءمينيستردىڭ ءسوزىن باسىلىم.
لاۆروۆ جانجال باستالعاننان بەرى رەسەيلىك تاراپ ۇستانىمىن ءبىر دە ءبىر وزگەرتپەگەنىن اتاپ ءوتتى. «وسى ۇستانىم اياسىندا اقىلعا قونىمدى ىمىرالار ىزدەۋگە دايىنبىز، ءبىراق قاۋىپسىزدىگىمىزدى قامتاماسىز ەتۋ، شەكارالارىمىزدا ناتو-نىڭ پايدا بولۋىنا جول بەرمەۋ جانە وسى جەرلەردە عاسىرلار بويى تۇرىپ جاتقان ورىس جانە ورىس ءتىلدى ادامداردىڭ زاڭدى قۇقىقتارىن قامتاماسىز ەتۋ مىندەتىن تۇبەگەيلى وزگەرتكەن جوقپىز»، — دەدى رەسەي ءسىم باسشىسى.
پرەزيدەنت كومەكشىسى يۋري ۋشاكوۆتىڭ ايتۋىنشا، رەسەي ۋكراينا جانجالىن رەتتەۋ بويىنشا كەلىسسوزدەردى ىقتيمال قايتا باستاۋ ءۇشىن ءابۋ-دابيدى باسىم الاڭ سانايدى.
بۇعان دەيىن دونالد ترامپتىڭ ارنايى وكىلدەرى — ستيۆ ۋيتكوفف پەن دجارەد كۋشنەر ماسكەۋگە بارىپ، رەسەيلىك كوشباسشى ۆلاديمير پۋتينمەن كەلىسسوزدەر جۇرگىزگەن. كەيىن ولار ۋكراينا پرەزيدەنتى ۆلاديمير زەلەنسكيمەن كەزدەستى. وسىدان سوڭ اقش پرەزيدەنتى زەلەنسكي مەن پۋتينمەن ءۇشجاقتى كەزدەسۋ وتكىزۋگە جول بەردى.
ال قارساڭىندا امەريكاندىق كوشباسشى ۋكراينا مەن رەسەي ءبىر-بىرىنىڭ ەنەرگەتيكالىق نىساندارىنا شابۋىل جاساماۋعا كەلىسكەنىن مالىمدەدى.