رەسەي ۋكراينامەن كەلىسسوزدەر جۇرگىزۋ ءۇشىن «ءۇزىلىس» جاريالاماق ەمەس. بۇل تۋرالى رەسەي سىرتقى ىستەر ءمينيسترى سەرگەي لاۆروۆ نيۋ-يوركتە بۇۇ قاۋىپسىزدىك كەڭەسىنىڭ وتىرىسىندا سويلەگەن سوزىندە مالىمدەدى، دەپ حابارلايدى infohub.kz سايتى.
رەسەي سىرتقى ساياسي ۆەدومستۆوسى باسشىسىنىڭ ايتۋىنشا، ماسكەۋ ۋكرايناداعى سوعىستى رەتتەۋ ءۇشىن كەلىسسوزدەرگە دايىن. سونىمەن قاتار لاۆروۆ «ەۋروپا ءدال وسىنى قالاعانىمەن، ءبارى سول قاراپايىم ماقساتپەن — تىنىعۋ ءۇشىن جانە كييەۆ رەجيمىنىڭ سارقىلعان اسكەري ارسەنالدارىن تولىقتىرۋ ءۇشىن» ەكەنىن اتاپ ءوتتى.
نيۋ-يوركتە سەرگەي لاۆروۆ اقش مەملەكەتتىك حاتشىسى ماركو رۋبيومەن كەزدەستى. ءوز كەزەگىندە اقش مەملەكەتتىك دەپارتامەنتىنىڭ باسشىسى ۆاشينگتون بىتىمگە قول جەتكىزۋ ءۇشىن سىندارلى ءرول اتقارۋعا دايىن ەكەنىنە سەندىردى.
بۇعان دەيىن ۆلاديمير زەلەنسكي دە دونالد ترامپتىڭ كومەگىمەن رەسەيمەن قاقتىعىستى قىسقا دەيىن اياقتاۋعا ۇمىتتەنەتىنىن بىلدىرگەن. اقش پرەزيدەنتى ۋكرايناداعى قاقتىعىستى قالاي رەتتەۋ جونىندە جۇمىس ىستەپ جاتقانىن ايتىپ، ۋكراين قاقتىعىسىن قىسقا دەيىن شەشۋگە بولادى دەپ ۇمىتتەنەتىنىن جەتكىزدى. امەريكا كوشباسشىسى سونداي-اق رەسەيلىك ارىپتەسىمەن تاعى ءبىر جەكە كەزدەسۋ وتكىزۋى مۇمكىن ەكەنىن جوققا شىعارمادى.
بۇۇ باس اسسامبلەياسىنىڭ 81-سەسسياسى اياسىندا دونالد ترامپ پەن ۆلاديمير زەلەنسكيدىڭ كەزدەسۋى ءوتتى، ودان كەيىن ۋكراين كوشباسشىسى رەسەيمەن كەلىسسوزدەرگە دايىن ەكەنىن مالىمدەدى.