تانىمال امەريكاندىق باسكەتبولشى لەبرون دجەيمس «فيلادەلفيا سەۆەنتي سيكسەرس» ساپىنا قوسىلعانىن مالىمدەدى، دەپ حابارلايدى infohub.kz.
41 جاستاعى شابۋىلشى وتكەن ماۋسىم اياقتالعان سوڭ مانسابىن اياقتاۋعا دايىن بولعانىن، ءبىراق ءالى دە باسكەتبولدى جاقسى كورەتىنىن مويىندادى. «سوڭعى بىرنەشە اپتا وتە ەرەكشە بولدى. بۇرىن ەشقاشان نە ىستەرىمدى بىلمەي، جاي عانا ويلانۋعا ۋاقىت بولە الماپپىن. وسى بىرنەشە ايدا مەن جاقسى كورەتىن ادامدارىمنىڭ قاسىندا بولىپ، ءبارىن تۇسىنۋگە تىرىستىم. ەندى شەشىم قابىلداندى. مەن اقشا قۋىپ جۇرگەن جوقپىن. مۇنى وتباسىم ءۇشىن ىستەپ جاتقان جوقپىن. ەندەشە، قازىرگى كەزەڭدە نەگە وينايمىن؟ مەن ءالى دە قۇرباندىققا بارۋعا دايىنمىن. ءالى دە تەر توگىپ، ەڭبەكتەنگىم كەلەدى. ءالى دە باسەكەگە ءتۇسىپ، جەڭىپ، تاعى ءبىر چەمپيوندىقتىڭ ءدامىن تاتۋعا مۇمكىندىك العىم كەلەدى. مەن «فيلادەلفيانى» چەمپيوندىق كومانداعا اينالدىرۋعا كومەكتەسە الامىن دەپ سەنەمىن. جاڭا جانكۇيەرلەردى شابىتتاندىرىپ، سوڭعى رەت كەرەمەت ساپاردى باستاۋعا قۋانىشتىمىن»، — دەپ جازدى دجەيمس.
لەبرون سونداي-اق ءوزىنىڭ بۇرىنعى كوماندالارىنا — «لوس-اندجەلەس لەيكەرس»، «كليۆلەند كاۆالەرس» جانە «مايامي حيت»-كە العىس ءبىلدىردى. سپورتشىنىڭ مۇددەسىن بىلدىرەتىن اگەنت ريچ پول ESPN-گە 8 ملن دوللارعا ەكى جىلدىق كەلىسىمشارت جاسالعانىن حابارلادى.
دجەيمس — ءتورت دۇركىن نبا چەمپيونى جانە ءتورت دۇركىن ليگانىڭ ەڭ قۇندى ويىنشىسى. وعان نبا-دا جيناعان ۇپايلار (43 440)، وتكىزىلگەن ماۋسىمدار (23) جانە ويىندار (1917) بويىنشا رەكوردتار تيەسىلى. اقش قۇراماسىنىڭ ساپىندا ول ءۇش رەت وليمپيادا چەمپيونى اتاندى جانە ءبىر رەت قولا جۇلدە الدى.