ليبەريانىڭ ادىلەت مينيسترلىگى بۇرىنعى ۆيسە-پرەزيدەنت دجۋەل حوۆارد-تەيلوردى ەسىرتكى ساۋداسى، اقشا جىلىستاتۋ جانە باسقا دا قىلمىستار ءۇشىن ايىپتادى. بۇل — ترانسۇلتتىق ەسىرتكى جەلىسىنە قاتىستى تەرگەۋدىڭ بولىگى، دەلىنگەن مينيسترلىك مالىمدەمەسىندە.
2018-2024 جىلدارى ۆيسە-پرەزيدەنت قىزمەتىن اتقارعان حوۆارد-تەيلور روبەرتس حالىقارالىق اۋەجايىندا ليبەريادان شىعۋعا ارەكەت جاساعان كەزدە توقتاتىلىپ، ليبەريا ۇلتتىق پوليسياسىنىڭ باسقارماسىنا جەتكىزىلگەن. وعان باقىلاۋداعى زاتتاردى ليسەنزياسىز يمپورتتاۋ، ساتۋ، تاراتۋ جانە تاسىمالداۋ، ەسىرتكى ساۋداسى، قىلمىسقا شاقىرۋ، قىلمىسقا جاردەمدەسۋ، قىلمىستىق ءسوز بايلاسۋ جانە اقشا جىلىستاتۋ ايىپتارى تاعىلادى.
حوۆارد-تەيلور ليبەريانىڭ بۇرىنعى پرەزيدەنتى چارلز تەيلورمەن نەكەدە بولعان. چارلز تەيلور سەررا-لەونەدەگى قاتىگەزدىكتەرگە دەمەۋشىلىك جاساعانى ءۇشىن حالىقارالىق سوعىس قىلمىستارى سوتىمەن سوتتالعان بولاتىن.
ۇكىمەت سونداي-اق جەلىدەگى رولدەرى ءۇشىن ءۇش شەتەلدىكتى سىرتتاي ايىپتادى: حورۆاتيالىقتار نيكولاي يۆانچيچ پەن ميحوۆيل ۆروۆاچ جانە ۋكراينالىق تارا زادەريەكو. بيلىك ولاردى تاۋىپ، ۇستاۋ ءۇشىن شارالار قولداناتىنىن مالىمدەدى.
بۇل ايىپتار وتكەن ايدا ليبەريا تاريحىنداعى ەڭ ءىرى ەسىرتكى تاركىلەۋ — شامامەن 336 ميلليون دوللار تۇراتىن توننالاگان كوكاين تۋرالى حابارلانعاننان كەيىن جاسالىپ وتىر. بيلىك بۇل ىسكە جوعارى پوليسيا شەنەۋنىكتەرى قاتىسى بار دەپ مالىمدەگەن. ەكى ءىس بىر-بىرىمەن بايلانىستى ەمەس.
سوڭعى جىلدارى باتىس افريكا وڭتۇستىك امەريكادان ەۋروپاعا تاسىمالداناتىن كوكايننىڭ نەگىزگى ترانزيتتىك جولىنا اينالدى. كونترابانداشىلار ايماقتىڭ كەيبىر بولىكتەرىندەگى ءالسىز شەكارا باقىلاۋى مەن قۇقىق قورعاۋ جۇيەسىنىڭ كەمشىلىكتەرىن پايدالانۋدا.