ماسساچۋسەتس شتاتىنداعى ليندسي كلەنسيدىڭ ءىسى بويىنشا القابيلەر القاسىنىڭ ءتورايىمى روني كارلسون NBC 10 Boston ارناسىنا بەرگەن سۇحباتىندا، قازىلار القاسىنىڭ ءبىر مۇشەسى ايىپتالۋشىنىڭ كىناسىزدىگىنە كۇماندانعانىمەن، اقتاۋ داۋىسىن بەرۋدەن باس تارتقانىن مالىمدەدى.
كلەنسيدىڭ ءىسى سوت تورەلىگىنىڭ ناتيجەسىندە شەشىلمەي قالعان سوڭ، القابيلەردىڭ ءبىرى اقتاۋعا قارسى بولعانى بەلگىلى بولدى. كارلسوننىڭ ايتۋىنشا، سول القابي ءوزىنىڭ كۇمانىن مويىنداعانىمەن، «اقىل-ەسى دۇرىس ەمەس» دەگەن نەگىزدە اقتاۋعا داۋىس بەرۋدەن باس تارتقان. بۇل جاعداي سوت پروسەسىنىڭ شيەلەنىسۋىنە اكەلدى.
زەينەتكەر ءمۇعالىم كارلسون: «ول كۇمانىن مويىندادى، مەن قۇجاتتاردى تولتىرا باستادىم. مەن قاتتى قۋاندىم»، – دەيدى. ءبىراق كەيىن ول ءالقابيدىڭ: «مەن ونى اقىل-ەسى دۇرىس ەمەس دەپ اقتاۋعا دايىن ەمەسپىن»، – دەگەنىن ايتتى.
تاعى ءبىر القابي پاۋلا دەۆلين بولسا، بۇل كىسىنى «وتە تاكاپپار» دەپ سيپاتتاپ، «ول ەشكىمنىڭ پىكىرىن تىڭدامادى»، – دەدى. اتالعان القابي ازىرگە سوت پروسەسىنە قاتىستى جاريا تۇردە پىكىر بىلدىرگەن جوق.
القابيلەر القاسىنىڭ ءتورايىمى كارلسون ماسساچۋسەتس سۋدياسى ۋيليام سالليۆانعا 12 ادامنان تۇراتىن القابيلەردىڭ ءبىرى سوتتىڭ نۇسقاۋلارىن ورىنداماي، نەگىزدى كۇمان تۋرالى ەرەجەنى ەلەمەي وتىرعانىن حابارلاعان.
ەسكە سالايىق، 2023 جىلدىڭ قاڭتارىندا ليندسي كلەنسي ءوزىنىڭ ءۇش كىشكەنتاي بالاسىن تۇنشىقتىرىپ ءولتىرىپ، كەيىن وز-وزىنە قول جۇمساماق بولىپ، تەرەزەدەن سەكىرگەن ەدى. وسى وقيعا سالدارىنان ول مۇگەدەك بولىپ قالدى.
سوت پروسەسىندە ايىپتاۋشىلار ونىڭ بالالاردى ادەيى ولتىرگەنىن دالەلدەۋگە تىرىستى. ال قورعاۋشىلار كلەنسيدىڭ بالالارىن ولتىرگەنىن جوققا شىعارماعانىمەن، ونىڭ پسيحيكالىق دەنساۋلىعى ناشارلاپ، پسيحوزدىق جاعدايعا تۇسكەنىن، ءبىراق وعان ءتيىستى كومەك كورسەتىلمەگەنىن ايتتى. ادۆوكاتتار ونى دۇرىس دياگنوز قويماي، ارتىق دارى-دارمەكپەن ەمدەگەن دەنساۋلىق ساقتاۋ جۇيەسىن كىنالادى.
القابيلەر سوتتا ۇسىنىلعان دالەلدەمەلەر كلەنسيدىڭ بالالارىن جاقسى كورگەنىن كورسەتەتىنىن ايتتى. كارلسون: «ونىڭ كۇندەلىكتەرىنەن باستاپ، قايىن ەنەسىنىڭ ايتقاندارىنا دەيىن ءبارى ونىڭ بالالارىن جاقسى كورگەنىن دالەلدەدى. سوندىقتان ول ءبىر ساتتە ەسىنەن اداسىپ، نە ىستەپ جاتقانىن تۇسىنبەگەن بولۋى كەرەك»، – دەدى.
القابيلەر ءبىراۋىزدان شەشىمگە كەلە الماعاندىقتان، سۋديا سوت پروسەسىن اياقتاماي، جاڭا سوت تاعايىندادى. كلەنسي ازىرگە پسيحياتريالىق اۋرۋحانادا ۇستالۋدا. كەلەسى سوت وتىرىسى 29 قىركۇيەككە بەلگىلەنگەن. ايىپتاۋشىلار ونى قايتا سوتقا تارتاتىنىن ازىرگە حابارلاعان جوق.
اقش-تا انالارعا ارنالعان ۇلتتىق دەنساۋلىق ساقتاۋ جەلىسى: 1-833-852-6262. ۇلىبريتانيادا Pandas قورى WhatsApp ارقىلى 07903 508334 نومىرىنەن كومەك كورسەتەدى. اۆستراليادا انالار مەن پەريناتالدىق پسيحيكالىق دەنساۋلىق جەلىسى: 1300 726 306.