ليتۆا بيلىگى اسكەري ءقاۋىپ نەمەسە اۋىر داعدارىس تۋىنداعان جاعدايدا حالىقتى كوشىرۋدىڭ ەگجەي-تەگجەيلى جوسپارىن ازىرلەدى. اقپاراتقا سايكەس، ازاماتتاردى پولشاعا شىعارۋ جوسپارلانىپ وتىر، دەپ حابارلايدى infohub.kz سايتى.
ەل استاناسى ۆيلنيۋستەن كوشىرۋدىڭ ءۇش نەگىزگى باعىتىنىڭ بىرەۋى پولشا شەكاراسىنا قاراي باعىتتالعان. قالعان مارشرۋتتار ەلدىڭ سولتۇستىگى مەن باتىسىنا جۇرگىزىلەدى. پولشا رەسپۋبليكاسىنىڭ پودلياسكوە ۆوەۆودستۆوسى بيلىگى ايماقتى بالتىق ەلدەرى تۇرعىندارى ءۇشىن ترانزيتتىك ءدالىز رەتىندە دايىنداۋ جۇمىستارىن جۇرگىزۋدە.
ليتۆا جوسپارى بويىنشا كوشىرۋ پروسەسى مەن كەزەكتىلىگى ەڭ الدىمەن ءقاۋىپتىڭ ورنى مەن اۋقىمىنا بايلانىستى بولۋى ءتيىس.
«ەل بيلىگى ءبىر جىل بۇرىن جاڭارتىلعان جوسپاردى ۇسىندى، وعان سايكەس استانادان كوشىرۋ باعىتتارىنىڭ ءبىرى پولشا بولۋى كەرەك. قالعان باعىتتار ەلدىڭ سولتۇستىگى مەن باتىسىنا اپارادى. كوشىرۋ تىكەلەي ءقاۋىپ تۋىنداعانعا دەيىن باستالۋى ءتيىس. ۆيلنيۋس تۇرعىندارى اتقىلاۋ كەزىندە قالادان كوشىرۋ مارشرۋتتارىنىڭ بىرىمەن شىعامىز دەپ سەنبەۋى كەرەك»، — دەدى ۆيلنيۋس قالالىق ءوزىن-وزى باسقارۋ دەپارتامەنتىنىڭ ازاماتتىق قورعانىس وكىلى جيگيمانتاس سولوۆەۆاس.
مۇنداي جاعدايدا پاناحاناعا تىعىلۋ قاجەت. ۆەدومستۆو كوشىرۋ جوسپارىن دايىنداۋدىڭ ءبىر سەبەبى تۇرعىنداردى كوشىرۋ باقىلاناتىن پروسەسس بولۋى كەرەك دەگەن ويعا ۇيرەتۋ بولعانىن مالىمدەدى.
جاريالانىمدا پودلياسكوە ۆوەۆودستۆوسىن بالتىق ەلدەرىنىڭ كوشىرۋ جۇيەسىنە قوسۋ شەشىمى پولشانىڭ ىشكى ىستەر مينيسترلىگى مەن اكىمشىلىگىنىڭ پولشانىڭ شىعىس شەكاراسىندا بىرنەشە جىلدان بەرى جالعاسىپ كەلە جاتقان قارۋلى قاقتىعىسقا جانە ەسكالاسيانىڭ ناقتى قاۋپىنە تىكەلەي رەاكسياسى ەكەنى اتاپ وتىلگەن.
ەسكە سالايىق، 11 قىركۇيەكتە رەسەي پرەزيدەنتىنىڭ ءباسپاسوز حاتشىسى دميتري پەسكوۆ ليتۆا اۋماعى قانداي جاعدايدا يادرولىق قارۋدىڭ نىساناسىنا اينالاتىنىن ايتقان بولاتىن.
سونداي-اق بۇعان دەيىن گەرمانيا بيلىگى ەلدىڭ دەنساۋلىق ساقتاۋ جۇيەلەرىنىڭ سوعىسقا جانە جارالىلاردىڭ جاپپاي اعىنىنا دايىندىق دەڭگەيىن تەكسەرۋدى باستاعانى بەلگىلى بولدى.