ليۆان تاياۋ شىعىستا ءولىم جازاسىن الىپ تاستاعان العاشقى ەل بولا الادى. پارلامەنت دەپۋتاتتارىنىڭ كوپشىلىگى بۇل شارانى قولدادى، دەپ حابارلايدى infohub.kz سايتى.
باسىلىمنىڭ مالىمەتىنشە، 128 ورىندىق پارلامەنت دەپۋتاتتارىنىڭ كوپشىلىگى ليۆاندا ءولىم جازاسىن الىپ تاستاۋ تۋرالى شەشىمدى قولداعان، ال «حەزبوللا» پارلامەنتتىك بلوگى قارسى داۋىس بەرگەن.
ەندى زاڭ جوباسى مينيسترلەر كابينەتىنە جىبەرىلەدى، سودان كەيىن پرەزيدەنت دجوزەف اۋنعا قول قويۋعا بەرىلەدى. ۇكىمەت بۇل شاراعا قولداۋ بىلدىرگەن.
ليۆاندا 2004 جىلدىڭ قاڭتارىنان بەرى ءولىم جازاسى قولدانىلماعانىمەن، سوتتار ءولىم ۇكىمدەرىن شىعارۋدى جالعاستىرۋدا. قۇقىق قورعاۋشىلاردىڭ ەسەبىنشە، ءولىم جازاسىنا كەسىلگەندەر كامەراسىندا ءالى دە 78-دەن استام ادام وتىر.
جاڭا زاڭناماعا سايكەس، ءولىم جازاسى كاتورگالىق جۇمىستارمەن ءومىر بويى باس بوستاندىعىنان ايىرۋمەن اۋىستىرىلادى. الايدا زاڭدا جازانىڭ جاڭا ءتۇرى قالاي قولدانىلاتىنى ءالى تولىق كورسەتىلمەگەن.
ءماجبۇرلى ەڭبەك ليۆان زاڭناماسىندا بۇرىننان قاراستىرىلعان، ءبىراق سوڭعى جىلدارى سيرەك قولدانىلعان. ەلدەگى قارجىلىق داعدارىس پەن تۇرمەلەردىڭ تولىپ كەتۋى بيلىكتىڭ رەسۋرستارى مەن مۇمكىندىكتەرىن شەكتەدى.
باسىلىم ليۆاندا بۇرىن ءولىم جازاسى اۋىرلاتاتىن ءمان-جايلارداعى كىسى ءولتىرۋ، تەرروريزمگە قاتىستى جانە ادام ولىمىنە اكەپ سوققان كەيبىر قىلمىستار، مەملەكەتتىك وپاسىزدىق، تىڭشىلىق جانە مەملەكەتتىك قاۋىپسىزدىككە قارسى قىلمىستار ءۇشىن تاعايىندالۋى مۇمكىن ەكەنىن ناقتىلادى.
ءولىم جازاسىن الىپ تاستاۋدىڭ الدىڭعى ارەكەتتەرى ءساتسىز اياقتالدى، ونىڭ ىشىندە 2004 جىلى پارلامەنتكە ۇسىنىلعان زاڭ جوباسى جانە 2008 جىلى ادىلەت مينيسترلىگىنىڭ ۇسىنىسى بار.