بولات ونەركاسىبىنىڭ ماگناتى لاكشمي ميتتالدىڭ كۇيەۋ بالاسى، تانىمال ينۆەستور اميت بحاتيا اعىلشىننىڭ «ليۆەرپۋل» فۋتبول كلۋبىنىڭ ەلەۋلى مينوريتارلىق ۇلەسىن 6 ملرد دوللاردان استام سوماعا ساتىپ الۋى مۇمكىن. بۇل تۋرالى Financial Times-كە سىلتەمە جاساپ، infohub.kz حابارلايدى.
Financial Times دەرەكتەرىنشە، اميت بحاتيا باستاعان جانە ميتتال وتباسى قولداعان ينۆەستورلار كونسورسيۋمى «ليۆەرپۋل» فۋتبول كلۋبىنىڭ ەلەۋلى مينوريتارلىق ۇلەسىن ساتىپ الۋ تۋرالى كەلىسسوز جۇرگىزۋدە. ينۆەستورلار توبى ۇسىنىستى ازىرلەۋ ءۇشىن كەڭەسشىلەردى جالداپ، قازىرگى امەريكالىق يەلەرى – Fenway Sports Group (FSG) كومپانياسىمەن مامىلەنى بەلسەندى تالقىلاپ جاتىر. ءۇش دەرەككوزدىڭ ايتۋىنشا، كەز كەلگەن مامىلەدە فۋتبول كلۋبى 6 ملرد دوللاردان استامعا باعالانادى – بۇل فۋتبول تاريحىنداعى ەڭ جوعارى سومالاردىڭ ءبىرى. مامىلەنى جاساۋ ارەكەتى جەتەكشى اعىلشىن فۋتبول كلۋبتارىنىڭ تارتىمدىلىعى مەن پرەمەر-ليگانىڭ جاھاندىق اۋقىمىن كورسەتەدى.
FSG كونسورسيۋمنىڭ قىزىعۋشىلىعىن FT-گە جاساعان مالىمدەمەسىندە راستادى. «اميت بحاتيا باسقاراتىن ينۆەستيسيالىق كونسورسيۋم «ليۆەرپۋل» فۋتبول كلۋبىنا ستراتەگيالىق مينوريتارلىق ينۆەستيسيالار سالۋعا قىزىعۋشىلىق ءبىلدىردى»، — دەلىنگەن مالىمدەمەدە.
بحاتيا ازىرگە باسىلىمعا جاۋاپ بەرمەگەن. FT اتاپ وتكەندەي، «ليۆەرپۋل» – الەمدىك سپورتتاعى ەڭ ءىرى برەندتەردىڭ ءبىرى. كلۋب ۋەفا چەمپيوندار ليگاسىن التى رەت، ال انگليا چەمپيوناتىن رەكوردتىق 20 رەت جەڭىپ العان. FSG باسشىلىعىمەن كلۋب الاڭ ىشىندە دە، سىرتىندا دا ايتارلىقتاي وزگەرىستەرگە ۇشىرادى. 2020 جىلى كلۋب پرەمەر-ليگانى جەڭىپ، 30 جىل ىشىندە العاش رەت انگليا چەمپيونى اتاندى. 2025 جىلى كلۋب تاعى ءبىر تيتۋلعا يە بولدى. سونداي-اق، «ليۆەرپۋل» 2019 جىلى ۋەفا چەمپيوندار ليگاسىن جەڭىپ العان.
ەسكە سالا كەتەيىك، ءۇندىستاندىق بيزنەسمەن لاكشمي ميتتال 2006 جىلدان 2021 جىلعا دەيىن الەمدەگى ەڭ ءىرى بولات ءوندىرۋشى ArcelorMittal كومپانياسىنىڭ باس ديرەكتورى بولدى. 2023 جىلعى جەلتوقساندا لاكشمي ميتتال قازاقستان ۇكىمەتىمەن «ارسەلورميتتال تەميرتاۋ» كومپانياسىنىڭ باسقا ينۆەستورعا ءوتۋى تۋرالى مامىلەگە تۇسىنىكتەمە بەردى.