ليۆەرپۋل فۋتبول كلۋبىنىڭ يەسى — «فەنۋەي سپورت گرۋپ» (فسگ) ءبريتاندىق-ۇندىستاندىق ينۆەستور اميت بحاتيا باسقاراتىن كونسورسيۋممەن كلۋبتىڭ ازشىلىق ۇلەسىن ساتۋ تۋرالى كەلىسسوز جۇرگىزىپ جاتىر. بۇل تۋرالى فسگ وكىلى فرانس پرەسسكە مالىمدەدى، دەپ حابارلايدى infohub.kz.
اميت بحاتيا — ءۇندى بولات ماگناتى لاكشمي ميتتالدىڭ كۇيەۋ بالاسى. ول 20 دۇركىن انگليا چەمپيونى اتانعان كلۋبقا قاراجات سالعىسى كەلەتىن كونسورسيۋمدى باسقارادى. Financial Times گازەتىنىڭ دەرەگىنشە، بحاتيا كەڭەسشىلەردى جالداپ، ۇسىنىس ازىرلەگەن. بۇل كەلىسىم ليۆەرپۋلدىڭ قۇنىن 6 ميلليارد دوللاردان اسىرۋى مۇمكىن.
بحاتيا — لوندوندا تۋىپ-وسكەن 46 جاستاعى ينۆەستور. ول ليۆەرپۋلگە قىزىعۋشىلىق تانىتقاننان كەيىن بىرنەشە ساعات ىشىندە انگليا چەمپيونشيپىندەگى «قۋينز پارك رەينجەرس» (قپر) كلۋبىنىڭ ديرەكتورى جانە بىرلەسكەن يەسى قىزمەتىنەن كەتتى. باتىس لوندوندىق كلۋبتا 18 ماۋسىم وتكىزگەن بحاتيا ءوز ۇلەسىن نەگىزگى يەسى رۋبەن گنانالينگامعا بەردى.
«مەن رەسمي مىندەتتەرىمنەن ماقتانىش، ريزاشىلىق جانە سۇيىسپەنشىلىكپەن كەتەمىن. ويىنشىلارعا، جاتتىقتىرۋشىلارعا، قىزمەتكەرلەرگە، قوعامداستىق سەنىمىنە، ارىپتەس ديرەكتورلارعا جانە ەڭ باستىسى، مەنى مەن وتباسىمدى قپر وتباسىنىڭ ءبىر بولىگى ەتكەن جانكۇيەرلەرگە العىس ايتامىن»، — دەدى بحاتيا.
بحاتيا مەن فسگ اراسىنداعى كەلىسسوز ءالى باستاپقى كەزەڭدە ەكەنى ايتىلادى. ازىرگە ەشقانداي كەلىسىم جاسالعان جوق. فسگ ليۆەرپۋلدى 2010 جىلى 300 ميلليون بريتان فۋنتىنا (400 ميلليون دوللار) ساتىپ العان ەدى. بحاتيانىڭ ينۆەستيسياسى كلۋبتى ودان ءارى تابىستى ەتۋگە باعىتتالعان. 2023 جىلى فسگ كلۋبتىڭ ازشىلىق ۇلەسىن «ديناستي» اتتى جاھاندىق سپورتتىق ينۆەستيسيالىق كومپانياعا ساتقان بولاتىن. ول كەزدەگى مامىلە سوماسى 100-200 ميلليون دوللار ارالىعىندا باعالانعان.