جاڭا الاتاۋ قالاسىنداعى Iconic Tower مۇناراسىنىڭ قۇرىلىس جوباسىنا وڭتۇستىككورەيالىق Lotte Hotels & Resorts قوناق ءۇي جەلىسىن تارتۋ جوسپارلانۋدا. بۇل تۋرالى قازاقستان پرەمەر-مينيسترى ولجاس بەكتەنوۆتىڭ توراعالىعىمەن وتكەن قالا كەڭەسىنىڭ وتىرىسىندا بەلگىلى بولدى، دەپ حابارلايدى infohub.kz.
بۇعان دەيىن Iconic Towers الاتاۋداعى العاشقى ءارى ەڭ بيىك مۇنارا رەتىندە جاريالانعان بولاتىن. قازىرگى كەزدە بيىكتىگى 272 مەتر، 80 قاباتتى كەشەننىڭ قۇرىلىسىنا تارتىلعان جەكە ينۆەستيسيا كولەمى $800 ملن استام. نىساندى پايدالانۋعا بەرۋ 2029 جىلدىڭ سوڭىنا جوسپارلانعان.
كەشەن ورتاق ءۇش قاباتتى پوديۋمدا ورنالاسقان ءارتۇرلى قاباتتاعى ەكى مۇنارادان تۇرادى. 80 قاباتتى مۇنارادا حالىقارالىق دەڭگەيدەگى بەس جۇلدىزدى قوناق ءۇي ورنالاسادى (مۇمكىن، ءدال وسى جەردە Lotte ءوز ۇلەسىن قوسادى)، ال ەكىنشى 56 قاباتتى مۇنارادا ا كلاسىنداعى كەڭسەلەر مەن پاتەرلەر بولادى. كەشەننىڭ جالپى اۋدانى 276،8 مىڭ شارشى مەتردى قۇرايدى، ونىڭ 58 مىڭ شارشى مەترى مادەني كەڭىستىكتەر مەن ساۋدا-ويىن-ساۋىق ورتالىعىنا بولىنەدى.
جوبانىڭ نەگىزگى قۇرىلىسشىسى جانە دەۆەلوپمەنت-مەنەدجەرى — قىتايلىق China State Construction Engineering Corporation (CSCEC). عيماراتتىڭ ديزاينىن بريتاندىق Zaha Hadid Architects ساۋلەت بيۋروسى مەن امەريكالىق Skidmore، Owings & Merrill (SOM) كومپانياسى ازىرلەدى.
Iconic Tower جوباسى بويىنشا اتقارۋ كوميتەتىنىڭ قۇرامىنا ق ر پرەزيدەنتىنىڭ Alatau City جوباسى بويىنشا باس كەڭەسشىسى ۆونگ حەان فاين، Caspian Group ديرەكتورلار كەڭەسىنىڭ ءتوراعاسى يۋري سحاي (Forbes نۇسقاسى بويىنشا ەڭ باي قازاقستاندىقتار رەيتينگىندە $100 ملن بايلىعىمەن 72-ورىندا)، Alatau City Bankء-تىڭ جالعىز اكسيونەرى جانە Kaspi.kzء-تىڭ بىرلەسكەن يەسى ۆياچەسلاۆ كيم ($7،1 ملرد بايلىعىمەن ەڭ باي قازاقستاندىقتار تىزىمىندە ءبىرىنشى ورىندا)، سونداي-اق CSCEC International ءتوراعاسى گاو بو كىرەدى.
Lotte كومپانياسىنىڭ ايماققا قىزىعۋشىلىعى الاتاۋداعى جوبامەن شەكتەلمەيدى. بۇعان دەيىن قازاقستاننىڭ دامۋ بانكى Sensata Invest كومپانياسىنىڭ (تاسبولات ابدۋللين مەن اسقار دۇيسەنباەۆقا تيەسىلى) الماتىدا Lotte جەلىسىنىڭ قوناق ءۇيىن سالۋ جانە ىسكە قوسۋ ءۇشىن قارجىلاندىرۋعا ءوتىنىمىن قاراستىرىپ جاتقانىن حابارلاعان.
Lotte Hotels & Resorts — وڭتۇستىك كورەياداعى ەڭ ءىرى ليۋكس كلاسىنداعى قوناق ءۇي جەلىسى، 1972 جىلدان بەرى جۇمىس ىستەيدى. كومپانيا وڭتۇستىك كورەيا، ۆەتنام، جاپونيا، وزبەكستان، ميانما، اقش جانە رەسەيدەگى قوناق ۇيلەردى باسقارادى.