اقش-تىڭ لۋيزيانا شتاتىندا 17 مىسىق ءولى تابىلىپ، تاعى 20-سى اۋىر جاعدايدا قۇتقارىلدى. وسى وقيعاعا بايلانىستى 29 جاستاعى مەديسون رەبەككا كولەللوعا ونداعان ايىپ تاعىلدى. ول بەيسەنبى كۇنى تاڭەرتەڭ لۋيزيانا شتاتىنداعى ۋوكەر قالاسىندا ورنالاسقان ليۆينگستون وكرۋگىنىڭ قاماۋ ورتالىعىنا ءوز ەركىمەن كەلگەن، دەپ حابارلايدى infohub.kz سايتى.
تەرگەۋ مالىمەتتەرىنە سۇيەنسەك، كولەللوعا ولگەن مىسىقتارعا قاتىستى جانۋارلارعا قاتىگەزدىك جاساۋدىڭ 17 قىلمىستىق ەپيزودى جانە جانۋارلارعا قاتىگەزدىك جاساۋدىڭ 37 اكىمشىلىك ەپيزودى بويىنشا ايىپ تاعىلعان.
ايىپتاۋعا ۋوكەر پوليسيا دەپارتامەنتى قىزمەتكەرلەرىنىڭ 12 قىركۇيەكتە جۇرگىزگەن تەكسەرۋى سەبەپ بولدى. ولار جانۋارلارعا قاتىگەزدىك جاسالدى دەگەن حابارلامانى تەكسەرۋ ءۇشىن شاقىرتۋ العان. ۆەدومستۆونىڭ مالىمەتىنشە، ءتارتىپ ساقشىلارى شامامەن تۇسكى 12:30-دا وقيعا ورنىنا كەلىپ، «ۋوففلس ۋەي حوۋم» دەپ اتالاتىن جەرگىلىكتى كاسىپورىننىڭ اشىق تۇرعان ەسىگىن كورگەن. ولار ىشكە باقىلاۋ ماقساتىندا كىرىپ، تەمپەراتۋرانىڭ 100°F (37،8°C) شاماسىنا جەتكەنىن انىقتاعان.
پوليسيانىڭ حابارلاۋىنشا، عيمارات ىشىندە ونداعان مىسىق پەن مىسىق بالاسى قامالىپ، ولاردىڭ ازىق-ت ۇلىككە جانە سۋعا قول جەتكىزۋ مۇمكىندىگى بولماعان. تەرگەۋشىلەردىڭ دەرەگىنشە، 17 جانۋار ءولى كۇيىندە تابىلسا، قالعان 20-سى اۋىر جاعدايدا قۇتقارىلعان.
«ميسس كولەللونىڭ جاۋاپكەرشىلىگىندە بولعان مىسىقتار مەن مىسىق بالالارى، ءسوزسىز، قورقىنىشتى تاعدىرعا تاپ بولدى. قاتىگەزدىككە ۇشىراعان جانۋارلاردىڭ سانى جۇرەكتى اۋىرتادى. ءبىزدىڭ دەپارتامەنت مۇنداي قاتىگەزدىككە ۋوكەردە جول بەرىلمەيتىنىن انىق جەتكىزۋدى كوزدەيدى»، – دەدى ۋوكەر پوليسياسىنىڭ باستىعى دەۆيد ەدديسون The Guardian باسىلىمىنا.
بيلىك وكىلدەرى مىسىقتار ۇستالعان اۋماقتىڭ گيگيەنالىق تۇرعىدان تازا بولعانىن، الايدا اسا جوعارى تەمپەراتۋرا مەن ۆەتەرينارلىق كومەكتىڭ جوقتىعى اۋىر ءارى ادامگەرشىلىككە جاتپايتىن سالدارعا اكەلگەنىن اتاپ ءوتتى.
پوليسيا امان قالعان جانۋارلارعا شۇعىل كومەك تارتقان. لۋيزياناداعى WAFB جاڭالىقتار ارناسىنىڭ مالىمەتىنشە، ۋوكەردىڭ جانۋارلاردى باقىلاۋ قىزمەتى، جاقىن ماڭداعى دەنحەم-سپرينگس قاۋىمداستىعىنىڭ جانۋارلار باسپاناسىنىڭ وكىلدەرى جانە Rescue، Rehome & Repeat كوممەرسيالىق ەمەس ۇيىمىنىڭ ەرىكتىلەرى مەديسينالىق كومەك كورسەتۋ مەن باسپانا بەرۋگە جۇمىلدىرىلعان.
لۋيزيانا گۋمانيتارلىق قوعامىنىڭ ديرەكتورى دجەفف دورسون The Advocate باسىلىمىنا بەرگەن سۇحباتىندا لۋيزيانا شتاتىنداعى گونزالەس قالاسىندا ورنالاسقان Rescue Alliance ۇيىمى كولەللو ءوزىنىڭ گاراجىندا ۇستاعان دەلىنگەن 12 ناۋقاس مىسىقتى ءوز قامقورلىعىنا العانىن ايتقان. دورسوننىڭ سوزىنشە، 12 مىسىقتىڭ بارلىعى جوعارعى تىنىس جولدارىنىڭ ينفەكسياسىمەن جانە ساڭىراۋقۇلاق اۋرۋىنا كۇدىكپەن زارداپ شەككەن.