پاريجدەگى لۋۆر مۇراجايى ءوز ەكسپوناتتارىنىڭ ءبىر بولىگىن قازاقستانداعى كورمەگە اكەلۋى مۇمكىن. بۇل مۇمكىندىكتى قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقبايەۆ پاريجدە فرانسۋز مۇراجايىنىڭ پرەزيدەنتى كريستوف لەريبو مەن تالقىلادى، دەپ حابارلايدى infohub.kz سايتى.
كەزدەسۋ فرانسياداعى قازاقستان مادەنيەتى كۇندەرى اياسىندا ءوتتى. ساپار بارىسىندا قازاقستاندىق ۆەدومستۆو باسشىسى فرانسيانىڭ مادەنيەت ءمينيسترى كاترين پەگارمەن دە كەلىسسوزدەر جۇرگىزدى. تاراپتار تەاتر، مۇراجاي جانە ارحيۆ ءىسى سالالارىندا ىنتىماقتاستىقتى كەڭەيتۋگە كەلىستى. اتاپ ايتقاندا، ەلدەر شىعارماشىلىق ۇجىمداردىڭ ءوزارا گاسترولدەرىن ۇيىمداستىرۋدى، سونداي-اق ماماندار ءۇشىن وقىتۋ، تاعىلىمدامالار مەن شەبەرلىك ساباقتارىن وتكىزۋدى جوسپارلاپ وتىر.
پاريجدەگى مادەني كۇندەر باعدارلاماسى قازاقستان كينوسىنىڭ كۇندەرى مەن برانلي جاعالاۋىنداعى مۇراجايدا – جاك شيراك مۇراجايىندا وتكەن «قازاقستان – فرانسيا: مادەني ديالوگتان بىرلەسكەن جوبالارعا» دوڭگەلەك ۇستەلىن قامتىدى.
باستى وقيعا پاريجدەگى «ماريني» تەاترىندا وتكەن قازاقستاندىق ارتىستەردىڭ گالا-كونسەرتى بولدى. كەشتى اشا وتىرىپ، ارمان قىرىقبايەۆ ءىس-شارانىڭ ديپلوماتيالىق ماڭىزدىلىعىن اتاپ ءوتتى:
«بۇگىندە قازاقستان مەن فرانسيا اراسىنداعى قارىم-قاتىناس نىعايتىلعان ستراتەگيالىق سەرىكتەستىك رۋحىندا قارقىندى دامىپ كەلەدى. 2024 جىلى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ فرانسياعا مەملەكەتتىك ساپارى جانە 2023 جىلى فرانسيا پرەزيدەنتى ەممانيۋەل ماكروننىڭ قازاقستانعا ساپارى ەكىجاقتى ىنتىماقتاستىققا جاڭا سەرپىن بەردى. بۇگىنگى گالا-كونسەرت حالىقتارىمىز اراسىنداعى دوستىقتى نىعايتۋ جولىنداعى تاعى ءبىر ماڭىزدى قادام بولادى دەپ سەنەمىن».
تەاتر ساحناسىندا فرانسۋز كورەرمەندەرىنە ءداستۇرلى قازاق اندەرى، كۇيلەرى جانە زاماناۋي تۋىندىلار ۇسىنىلدى. كونسەرتكە اليشەر كاريموۆ، زارينا التىنباەۆا، ەرنار سادىرباي (Amre)، ەلدار ساپارايەۆ، راسۋل جارماگامبەتوۆ، فارحات كۋبييەۆ، نازىم ساعىنتاي، «استانا بالەت» تەاترى، HasSak ەتنوفولكلورلىق ءانسامبلى جانە Mezzo توبى قاتىستى. مۋزىكالىق سۇيەمەلدەۋدى قۇرمانعازى اتىنداعى قازاق ۇلتتىق حالىق اسپاپتار وركەسترى قامتاماسىز ەتتى.
بۇعان دەيىن «كۋرسيۆ» لۋۆردىڭشۋلى توناۋدان كەيىن اپوللون گالەرەياسىن قالاي اشقانىن جازعان بولاتىن.