«جۇلدىزدى سوعىستار: يمپەريا سوققىسى» ءفيلمىنىڭ تۇسىرىلىمىندە مارك حەميلل قولدانعان ليۋك سكايۋوكەردىڭ ءتۇپنۇسقا ساۋلەلىك سەمسەرى اۋكسيوندا رەكوردتىق $3،75 ملن-عا (1،7 ملرد تەڭگەدەن ءسال استام) ساتىلدى. بۇل — «جۇلدىزدى سوعىستار» الەمىندەگى رەكۆيزيت ءۇشىن تولەنگەن ەڭ جوعارى سوما، دەپ حابارلايدى infohub.kz.
بۇل سەمسەر كينوساگانىڭ ەڭ تانىمال كورىنىستەرىنىڭ بىرىندە — ليۋك سكايۋوكەردىڭ دارت ۆەيدەرمەن سوڭعى ايقاسى كەزىندە پايدا بولادى. ءدال سول ساتتە ۆەيدەر ليۋكتىڭ قولىن كەسىپ، ايگىلى ءسوزىن ايتادى: «جوق. مەن سەنىڭ اكەڭمىن».
Heritage Auctions اۋكسيوندىق ءۇيى لوتتى باستاپقىدا $1–2 ملن-عا باعالاعان ەدى، ءبىراق سوڭعى باعا كۇتكەننەن الدەقايدا اسىپ ءتۇستى.
«جۇلدىزدى سوعىستار» رەكۆيزيتى اراسىنداعى الدىڭعى رەكورد «جۇلدىزدى سوعىستار: جاڭا ءۇمىت» فيلمىندە پايدالانىلعان X-wing جويعىشىنىڭ ۇلگىسىنە تيەسىلى ەدى. ول 2023 جىلى $3،135 ملن-عا ساتىلعان.
اۋكسيوندىق ءۇي وكىلدەرىنىڭ ايتۋىنشا، ساۋلەلىك سەمسەر — فرانشيزانىڭ ەڭ ماڭىزدى ساقتالعان جادىگەرلەرىنىڭ ءبىرى. ول Graflex فوتوۆسپىشكاسىنىڭ وڭدەلگەن تۇتقاسى نەگىزىندە جاسالعان جانە ليۋكتىڭ كەسىلگەن قولى بار كورىنىسكە ارنالعان ءتۇپنۇسقا رەكۆيزيتپەن بىرگە ساقتالعان. بۇل رەكۆيزيتتى يودا بەينەسىمەن دە اينالىسقان اتاقتى گريم سۋرەتشىسى ستيۋارت فريبورن جاساعان.