قازاقستاننىڭ مادەنيەت جانە اقپارات ءمينيسترى ارمان قىرىقبايەۆ وڭتۇستىك كورەيانىڭ تەدجون قالاسىندا كورەي گەنەرالى وڭ بوم دو جەرلەنگەن مەموريالدىق كەشەنگە باردى. ءراسىم پرەزيدەنت قاسىم-جومارت توقاەۆتىڭ تاپسىرماسىمەن ءوتتى، دەپ حابارلايدى infohub.kz سايتى.
ۆەدومستۆونىڭ ءباسپاسوز قىزمەتى ءمالىم ەتكەندەي، مادەنيەت جانە اقپارات مينيسترلىگىنىڭ جاڭا باسشىسى ارمان قىرىقبايەۆ مەملەكەت باسشىسىنىڭ كورەيا رەسپۋبليكاسىنا رەسمي ساپارى اياسىنداعى دەلەگاسيا قۇرامىندا ءجۇر.
مەموريال جانىندا قۇرمەتتى قاراۋىل قاتىسقان ءراسىم ءوتتى. مينيستر گۇل قويىپ، ءومىرىن كورەيانىڭ تاۋەلسىزدىگى جولىنداعى كۇرەسكە ارناعان گەنەرال وڭ بوم دو رۋحىنا تاعزىم ەتتى.
تەدجون مەموريالدىق كەشەنى وڭتۇستىك كورەياداعى باستى ەستە قالار ورىنداردىڭ ءبىرى سانالادى. مۇندا ەل الدىندا ەرەكشە ەڭبەگى سىڭگەن شامامەن 150 مىڭ ادام جەرلەنگەن.
وڭ بوم دو تاريحى قازاقستان مەن كورەيا قارىم-قاتىناسىندا ايرىقشا ورىن الادى. گەنەرال ءومىرىنىڭ سوڭعى جىلدارىن قازاقستاندا وتكىزدى. قايتىس بولعان سوڭ ول قىزىلوردادا جەرلەندى.
2021 جىلى وڭ بوم دو سۇيەگى قازاقستاندىق تاراپتىڭ كومەگىمەن وڭتۇستىك كورەياعا جەتكىزىلىپ، تەدجوندا قايتا جەرلەندى. بيىل گەنەرالدىڭ تاريحي وتانىنا ورالعانىنا بەس جىل تولادى.
ساپار سوڭىندا ارمان قىرىقبايەۆ قۇرمەتتى قوناقتار كىتابىنا جازبا قالدىردى.
«مەموريالعا بارۋ مەملەكەتتىك ساپار باعدارلاماسىنىڭ ءبىر بولىگىنە اينالىپ، ەكى حالىقتىڭ ورتاق تاريحىنا دەگەن تاعى ءبىر سيمۆولدىق قۇرمەت بولدى»، — دەپ اتاپ ءوتتى مينيسترلىكتە.
الدىڭعى كۇنى پرەزيدەنتتەر قاسىم-جومارت توقايەۆ پەن لي چجە ءمون سەۋلدە كەڭەيتىلگەن قۇرامدا كەلىسسوز جۇرگىزدى. وندا وڭتۇستىك كورەيا باسشىسى لي چجە ءمون ارىپتەسىنە ۇلتتىق باتىردىڭ سۇيەگىن وتانىنا قايتارۋعا كورسەتكەن جاردەمى ءۇشىن تاعى دا العىس ايتتى.