الماتى وبلىسى قاراساي اۋدانىنداعى جىبەك جولى اۋىلىندا 200 ورىنعا ارنالعان جاڭا مادەنيەت ءۇيىنىڭ اشىلۋى ءوتتى. نىساننىڭ قۇرىلىسىنا 658 ملن تەڭگە ءبولىندى، دەپ حابارلايدى infohub.kz.
جاڭا عيماراتتا كورەرمەندەر زالى، ساحنا جانە شىعارماشىلىق ۇيىرمەلەرگە ارنالعان كابينەتتەر جابدىقتالعان. مۇندا كونسەرتتەر مەن تەاتر قويىلىمدارى وتكىزىلىپ، دومبىرا، جىر-تەرمە، ۆوكال، بي جانە قولدانبالى ونەر ۇيىرمەلەرى جۇمىس ىستەيتىن بولادى.
سونىمەن قاتار، مادەنيەت ءۇيىنىڭ بازاسىندا اقىندارعا ارنالعان «شەجىرە» تالىمگەرلىك ورتالىعى مەن ۇلكەن بۋىن ءانسامبلى قۇرىلادى. بۇل الاڭ بالالار مەن جاستاردىڭ شۇعىلدانۋىنا جانە ۇلتتىق داستۇرلەردى ساقتاۋعا ىقپال ەتەدى دەپ كۇتىلۋدە.
سوڭعى ءتورت جىلدا الماتى وبلىسىنىڭ مادەني ينفراقۇرىلىمىن دامىتۋعا 52،6 ملرد تەڭگە باعىتتالدى. وسى ۋاقىت ىشىندە 10 جاڭا مادەني نىسان سالىنىپ، تاعى 19 مادەنيەت ءۇيى جوندەلدى.
بۇل رەتتە جۇمىستار جالعاسۋدا. جامبىل اۋدانىنداعى قارعالى جانە ىلە اۋدانىنداعى بورالداي ەلدى مەكەندەرىندە مادەنيەت ۇيلەرى سالىنۋدا. اعىمداعى جىلى جامبىل اۋدانىنىڭ شيەن اۋىلىنداعى نىساننىڭ قۇرىلىسى دا اياقتالدى.