نيكولاس مادۋرونىڭ جۇبايى سيليا فلورەس دەنساۋلىعىنا بايلانىستى ءۇيقاماققا شىعۋدى سۇرادى. ءتيىستى ءوتىنىشتى ونىڭ ادۆوكاتى مارك دوننەللي بەردى، دەپ حابارلايدى infohub.kz سايتى.
قورعاۋشىنىڭ ايتۋىنشا، ايەلگە جۇرەكتىڭ اۋىر دەرتى دياگنوزى قويىلعان. دوننەلليدىڭ مالىمدەۋىنشە، ونىڭ قورعالۋىنداعى ادام سوتتى ءۇيقاماقتا كۇتىپ، دارىگەرلەر ۇسىنعان جۇرەك كاتەتەريزاسياسىنان كەيىن قالپىنا كەلۋگە مۇمكىندىك الۋعا لايىق. ءارى قاراي، دەدى ادۆوكات، ودان دا كۇردەلى كارديولوگيالىق پروسەدۋرالار قاجەت بولۋى مۇمكىن.
مارك دوننەللي اتاپ وتكەندەي، بيىلعى وقيعالارعا دەيىن سيليا فلورەس دەنساۋلىعى مىقتى بولعان. ءقازىر وعان بىرنەشە ءدارى تاعايىندالعان، سونىڭ ىشىندە ىقتيمال جۇرەك ۇستاماسى كەزىندە قابىلدايتىن ءدارىسى دە بار. ادۆوكاتتىڭ قوسىمشا ايتۋىنشا، ونىڭ قورعالۋىنداعى ادام دارىگەرلەر ۇسىنعان تەكسەرۋلەر مەن حيرۋرگيالىق ارالاسۋ ماسەلەسىن شەشۋدى جالعاستىرۋدا.
سونىمەن قاتار قورعاۋشى فلورەستىڭ قاماۋعا الىنعان ساتتەن بەرى ءميترالدى كلاپان پرولاپسىن ەمدەۋگە ارنالعان اي سايىنعى ينەكسياسىن الماعانىن اتاپ ءوتتى.
ەسكە سالايىق، شامامەن ءبىر اپتا بۇرىن نيكولاس مادۋرو مەن ونىڭ جۇبايى وزدەرىنەن ەسىرتكى ساۋداسىنا قاتىستى ايىپتاۋلاردى الىپ تاستاۋدى سۇراعان بولاتىن. ساياساتكەردىڭ ادۆوكاتتارى ءىستى توقتاتۋدى تالاپ ەتتى.