حالىقارالىق اتوم ەنەرگياسى اگەنتتىگى (ماگاتە) كحدر يونبەندەگى باستى يادرولىق كەشەنىندە ۋران بايىتۋدىڭ جاڭا نىسانىن سالعانىن مالىمدەدى، دەپ حابارلايدى infohub.kz سايتى.
اگەنتتىكتىڭ باعامىنشا، جاڭا قۇرىلىس 28 كاسكادقا دەيىن گاز سەنتريفۋگاسىن سىيدىرا الادى.
«كانسون مەن يونبەندەگى بايىتۋ قوندىرعىلارىنىڭ قازىرگى جۇمىسى، سونداي-اق كحدر-دىڭ قارۋلىق يادرولىق ماتەريالىن ءوندىرۋدى ودان ءارى كەڭەيتۋى تۋرالى حابارلامالار قاتتى الاڭداۋشىلىق تۋدىرادى»، — دەپ اتاپ ءوتتى ماگاتە باس ديرەكتورى رافاەل گروسسي.
سونىمەن قاتار اگەنتتىك پحەنيانعا جاقىن كانسونداعى كەڭەيتىلگەن ۋران بايىتۋ نىسانىنىڭ ىسكە قوسىلا باستاعانىن مالىمدەدى.
ايتا كەتەيىك، ماگاتە ينسپەكتورلارى 2009 جىلدان بەرى سولتۇستىك كورەياعا كىرە المايدى، سوندىقتان اگەنتتىك پحەنياننىڭ ارەكەتىن سپۋتنيكتىك سۋرەتتەر مەن اشىق دەرەككوزدەردەگى مالىمەتتەردى، سونىڭ ىشىندە كحدر مەملەكەتتىك ب ا ق جاريالاعان فوتوسۋرەتتەردى تالداۋ ارقىلى باقىلاپ وتىر.
اگەنتتىك دەرەگىنشە، يونبەندەگى جاڭا ەكى قاباتتى عيمارات كەشەن اۋماعىنداعى ەكىنشى ۋران بايىتۋ نىسانى بولىپ تابىلادى. ماماندار مۇنداي قورىتىندىعا قۇرىلىس كەزەڭىندەگى سپۋتنيكتىك سۋرەتتەردى كحدر كوشباسشىسى كيم چەن ىننىڭ ماۋسىمداعى ساپارىندا تۇسىرىلگەن فوتوسۋرەتتەرمەن سالىستىرۋ ارقىلى كەلدى.
ەسكە سالايىق، 20 تامىزدا پحەنيان ماڭىنان جاپون تەڭىزىنە قاراي بىرنەشە جاقىن ۇشۋ قاشىقتىقتاعى بالليستيكالىق زىمىران ۇشىرىلدى.
شىلدەدە كحدر-دا ەلدىڭ يادرولىق كۇشتەرىن ساپالىق جانە ساندىق جاعىنان كۇشەيتۋ تۋرالى شەشىم قابىلداندى.