قازاقستاننىڭ عىلىم جانە جوعارى ءبىلىم مينيسترلىگى ماگيستراتۋرادا وقۋعا مەملەكەتتىك ءبىلىم گرانتتارىن بەرۋ كونكۋرسىنىڭ قورىتىندىلارى قاشان جاريالاناتىنىن حابارلادى، دەپ حابارلايدى infohub.kz سايتى.
ۆەدومستۆونىڭ ءباسپاسوز قىزمەتىنىڭ مالىمەتىنشە، 21 تامىزدا 2026-2027 وقۋ جىلىنا ارنالعان ماگيستراتۋراعا مەملەكەتتىك ءبىلىم گرانتتارىن بەرۋ جونىندەگى رەسپۋبليكالىق كوميسسيانىڭ وتىرىسى ءوتتى. ونىڭ قۇرامىنا مينيسترلىك، مۇددەلى مەملەكەتتىك ورگاندار، ءبىلىم سالاسىنداعى كاسىپوداقتار، ق ر ۇلتتىق كاسىپكەرلەر پالاتاسى جانە قوعامدىق ۇيىمداردىڭ وكىلدەرى كىردى. وتىرىس بارىسىندا تۇسكەن وتىنىمدەر قارالىپ، ءبىلىم گرانتتارىن ءبولۋ ءراسىمى قولدانىستاعى ەرەجەلەرگە سايكەس، كونكۋرستىق ىرىكتەۋ نەگىزىندە جۇرگىزىلدى.
بيىل كونكۋرسقا قاتىسۋعا شامامەن 23 مىڭ ءوتىنىم ءتۇستى، بۇل وتكەن جىلمەن سالىستىرعاندا 3 مىڭعا ارتىق. بولاشاق ماگيسترانتتار اراسىندا «پەداگوگيكالىق عىلىمدار»، «اقپاراتتىق-كوممۋنيكاسيالىق تەحنولوگيالار»، سونداي-اق «ينجەنەرلىك، وڭدەۋ جانە قۇرىلىس سالالارى» باعىتتارى ەڭ جوعارى سۇرانىسقا يە.
كونكۋرس ناتيجەلەرى 25 تامىزعا دەيىن ق ر عىلىم جانە جوعارى ءبىلىم مينيسترلىگى مەن ۇلتتىق تەستىلەۋ ورتالىعىنىڭ الەۋمەتتىك جەلىلەردەگى رەسمي پاراقشالارىندا جاريالانادى. بولاشاق ماگيسترانتتاردى وقۋعا قابىلداۋ 28 تامىزعا دەيىن جۇرگىزىلەدى.