حالىق ءارتىسى ماقپال ءجۇنىسوۆا جولدا كەلە جاتىپ وقىس وقيعاعا تاپ بولعانىن مالىمدەدى، دەپ حابارلايدى infohub.kz.
ءانشىنىڭ سوزىنشە، ول سىڭلىسىمەن بىرگە باعىت العان ساتتە كولىگىنىڭ دوڭگەلەگى كۇتپەگەن جەردەن جارىلىپ كەتكەن. جول جيەگىندە تۇرعان ونەر يەسىنە بەيتانىس جولاۋشى بىردەن كومەككە كەلىپ، دوڭگەلەكتى اۋىستىرىپ بەرگەن. ماقپال ءجۇنىسوۆا قيىن ساتتە قول ۇشىن سوزعان ازاماتقا الەۋمەتتىك جەلىدەگى پاراقشاسى ارقىلى ەرەكشە العىسىن ءبىلدىردى.
«ءسىڭلىم ەكەۋمىز كەلە جاتىر ەدىك، جولدا كولىكتىڭ دوڭگەلەگى جارىلدى. سۇلتان دەگەن اتىراۋدىڭ جىگىتى دوڭگەلەكتى سالىپ بەرەمىن دەدى. جاقسى ادامدار بار عوي، جاسى ۇزاق بولسىن»، – دەپ جازدى ءانشى.
جەلى قولدانۋشىلارى كولىكتىڭ جارىلعان دوڭگەلەگىن كورىپ، جول اپاتىنان امان قالعان ارتىسكە جىلى لەبىزدەرىن بىلدىرۋدە. وقىرماندار «بۇيىردەن جامان كەسىپ العان ەكەنسىزدەر، قۇداي ساقتاپتى»، «ادامنىڭ نيەتىنە قاراي جاقسىلار كەزدەسەدى» دەپ جارىسا جازىپ، انشىگە اماندىق تىلەدى.