فرانسيا پرەزيدەنتى ەممانۋەل ماكرون ەۋروپا رەسەيدىڭ اسكەري نىساناسىنا اينالۋى مۇمكىن دەپ مالىمدەدى. سەبەبى ەۋروپا ۋكراينانىڭ ستراتەگيالىق تىلى بولىپ وتىر. بۇل تۋرالى infohub.kz سايتى حابارلايدى.
فرانسۋز كوشباسشىسىنىڭ ايتۋىنشا، جاقىن ارادا رەسەي 300 مىڭ ادامدى جۇمىلدىرۋى مۇمكىن دەگەن سەناريدى شىندىققا جاناسىمدى دەپ سانايدى. اقش، ەۋروپا جانە ۋكراينا بارلاۋ دەرەكتەرىنە سىلتەمە جاساعان ماكرون رەسەي مەملەكەتتىك دۋما سايلاۋىنىڭ ءوتۋىن كۇتكەنىن قوستى.
سونىمەن قاتار فرانسيا پرەزيدەنتى سوڭعى اپتالاردا بۇكىل ەۋروپادا دۇشپاندىق ارەكەتتەر جيىلەگەنىن اتاپ ءوتتى.
«وتكەن اپتادا مەن ساياسي كۇشتەردىڭ وكىلدەرىن شاقىرىپ، ولاردى وسى ءقاۋىپتىڭ دامۋى جانە ءبىزدىڭ ەلىمىزدەگى سالدارى تۋرالى ەسكەرتتىم. رەسەي ەۋروپانى ۋكراينانىڭ ستراتەگيالىق تىلى دەپ سانايدى، ويتكەنى ەۋروپالىقتار ۋكرايندىقتارعا كومەكتەسىپ جاتىر جانە كييەۆ رەسەيدى سوعىستى توقتاتۋعا ماجبۇرلەۋ ءۇشىن ونىڭ مۇناي وڭدەۋ زاۋىتتارى مەن نىساندارىنا سوققى بەرىپ وتىر. سوندىقتان ەۋروپا نىساناعا اينالۋى مۇمكىن»، — دەدى ماكرون.
ونىڭ ايتۋىنشا، شابۋىلدار اقپاراتتىق سالادا جالعان اقپارات تاراتۋ ارقىلى جانە كيبەركەڭىستىكتە دە جۇزەگە اسىرىلىپ وتىر.
بۇعان دەيىن ماكرون رەسەي تاراپىنان گيبريدتىك شابۋىلدار ءقاۋپى كۇشەيىپ بارا جاتقاندا فرانسيا اسا ماڭىزدى ينفراقۇرىلىمدى قورعاۋ جوسپارىن دايىنداپ جاتقانىن مالىمدەگەن.
ەسكە سالايىق، بۇعان دەيىن ليتۆا بيلىگى اسكەري ءقاۋىپ تۋىنداعان جاعدايدا تۇرعىنداردى كوشىرۋدىڭ ەگجەي-تەگجەيلى جوسپارىن دايىنداعانى بەلگىلى بولدى. ازاماتتاردى پولشاعا كوشىرۋ جوسپارلانىپ وتىر.
سونداي-اق گەرمانيا بيلىگى ەلدىڭ دەنساۋلىق ساقتاۋ جۇيەلەرىنىڭ سوعىسقا جانە جارالىلاردىڭ جاپپاي اعىنىنا دايىندىق دەڭگەيىن تەكسەرۋدى باستاعانى حابارلانعان.