17 جاستاعى قازاقستاندىق ديسك لاقتىرۋشى ماكسيم ساجنيەۆ 61،37 مەتر ناتيجەمەن اقش-تىڭ يۋدجين قالاسىندا (ورەگون شتاتى) ءوتىپ جاتقان جەڭىل اتلەتيكادان جاستار اراسىنداعى الەم چەمپيوناتىنىڭ فينالىنا شىقتى، دەپ حابارلايدى infohub.kz.
بۇل ناتيجە سپورتشى ءۇشىن جەكە رەكورد بولدى: بۇعان دەيىن ونىڭ ۇزدىك كورسەتكىشى 60،45 مەتر ەدى. ىرىكتەۋدە كورسەتىلگەن ناتيجە قازاقستاننىڭ جاستار اراسىنداعى رەكوردى بولىپ تابىلادى.
ىرىكتەۋ جارىستارىندا ساجنەۆتەن بەس قاتىسۋشى وزىپ كەتتى. ۇزدىك ناتيجەنى اۋستريالىق ستەفان گايسباۋەر (63،11 مەتر) كورسەتتى، ەكىنشى ورىندى يتاليالىق فرانچەسكو د'انجەلو (62،63) يەلەندى، ءۇشىنشى — يامايكادان كەلگەن دجوزەف ريچارد سالمون (62،10). سونداي-اق قازاقستاندىقتان جوعارى پولياك ياكۋب رودزياك (61،58) پەن ۋكراين ياروسلاۆ ليستوپاد (61،50) ورنالاستى.
فينالدىق جارىستار 8-9 تامىزعا قاراعان ءتۇنى وتەدى.
ساجنيەۆ وسى چەمپيوناتتا فينالعا شىققان قازاقستاننىڭ ەكىنشى وكىلى بولدى. بۇعان دەيىن سىرىقپەن سەكىرۋشى اننا چەركاشينا 4،10 مەتر ناتيجەمەن فينالدا 11-ورىن العان بولاتىن. بۇل پاندە التىندى چەح نيكول كرۋتيلوۆا (4،45)، كۇمىستى ۋكراين ولگا بەلچەنكو (4،40)، قولانى امەريكاندىق كايلي نەيرا (4،35) جەڭىپ الدى.
وتكەن ءتۇنى چەمپيوناتتا تاعى ءۇش قازاقستاندىق ونەر كورسەتتى. مارگاريتا ستوروجەنكو 23.40،75 ناتيجەمەن 5 شاقىرىمعا جۇگىرۋدە 25-ورىن الدى، چەمپيونكا يتاليالىق سەرەنا دي فابيودان (20.57،57 — چەمپيونات رەكوردى) ءۇش مينۋتتاي قالىپ قويدى. ەرلەر اراسىندا سول قاشىقتىقتا 18 جاستاعى ەگور سترۋكوۆ 36-ورىنمەن (21.39،40)، ال 17 جاستاعى شەرحان ەگىزباي 38-ورىنمەن (27.31،77) مارەگە جەتتى. جەڭىستى اۋستراليالىق يسااك بيكروفت 20 جاسقا دەيىنگىلەر اراسىنداعى الەم رەكوردىمەن (18.40،37) باعىندىردى.
اقش-تاعى جەڭىل اتلەتيكادان جاستار اراسىنداعى الەم چەمپيوناتى بۇگىن تۇندە اياقتالادى. قازاقستان قۇراماسى نورماتيۆتەردى ورىنداعان التى ەر جانە بەس ايەل سپورتشىمەن ۇسىنىلعان. بۇل — پولشانىڭ بىدگوشش قالاسىندا وتكەن 2008 جىلعى جاستار اراسىنداعى الەم چەمپيوناتىنان كەيىنگى ەڭ كوپ قۇرام (12 سپورتشى). ەكى جىل بۇرىن پەرۋ استاناسى ليمادا ءبىزدىڭ سپورتشىلار سانى بەسەۋ ەدى، ال 2022 جىلى كولۋمبيانىڭ كالي قالاسىندا وتكەن الەم چەمپيوناتىندا تورتەۋ بولعان. قازاقستان 1994 جىلدان بەرى جاستار اراسىنداعى الەم چەمپيوناتىنا جەكە كوماندامەن قاتىسىپ، قاتارىنان 16 تۋرنيردە ونەر كورسەتتى، ءبىراق ءالى كۇنگە دەيىن جۇلدەلى ورىنعا ىلىككەن ەمەس.