جەتىسۋ وبلىسىندا مال ساتىپ الۋشىمىن دەپ تانىستىرىپ، قوي وتارىن يەمدەنگەن ەر ادامعا قاتىستى ۇكىم شىقتى، دەپ حابارلايدى infohub.kz سايتى.
جەتىسۋ وبلىسى پروكۋراتۋراسىنىڭ مالىمەتىنشە، اقسۋ اۋدانىندا بىرنەشە رەت الاياقتىق جاساعانى ءۇشىن كىنالى دەپ تانىلعان ادامدارعا قاتىستى سوت ۇكىمدەرى زاڭدى كۇشىنە ەندى.
قىلمىستىق ىستەردىڭ ءبىرى بويىنشا، سوتتالعان ادام ۇساق مال ساتىپ الۋشىمىن دەپ تانىستىرىپ، اششىبۇلاق اۋىلىنىڭ بەس تۇرعىنىنا تيەسىلى 266 قويدى الداپ، سەنىمدى تەرىس پايدالانىپ يەمدەنگەن. زارداپ شەككەندەرگە 13،8 ملن تەڭگەدەن استام شىعىن كەلتىرىلگەن. شىعىننىڭ ءبىر بولىگى وتەلگەنىنە قاراماستان، مەملەكەتتىك ايىپتاۋشى بۇل قايتالانعان الاياقتىق ءۇشىن قوعامنان وقشاۋلاۋعا بايلانىستى ەمەس جازا تاعايىنداۋعا نەگىز بولمايتىنىن اتاپ ءوتتى. سوت ايىپتالۋشىنى كىنالى دەپ تانىپ، 2 جىل 5 ايعا باس بوستاندىعىنان ايىرۋ جازاسىن تاعايىندادى.
تاعى ءبىر قىلمىستىق ءىس بويىنشا، 2023-2025 جىلدار ارالىعىندا سوتتالعان ادام قۇرىلىس ماتەريالدارىن جەتكىزەمىن، جۇرگىزۋشى كۋالىگىن راسىمدەپ بەرەمىن دەگەن جانە باسقا دا جالعان ۋادەلەرمەن 10 زارداپ شەگۋشىنىڭ 3 ملن تەڭگەدەن استام اقشاسىن الداپ العانى انىقتالدى. ءبىرىنشى ساتىداعى سوت وعان 3 جىل 6 اي باس بوستاندىعىن شەكتەۋ جازاسىن تاعايىندادى. اقسۋ اۋدانى پروكۋراتۋراسىنىڭ اپەللياسيالىق ءوتىنىشى بويىنشا ۇكىم وزگەرتىلىپ، جازا ءۇش جىلعا باس بوستاندىعىنان ايىرۋمەن الماستىرىلدى. اپەللياسيالىق ساتى كەلتىرىلگەن زالالدىڭ تولىق وتەلگەنىن ەسكەردى، الايدا بۇل جاعداي قىلمىستىق جاۋاپكەرشىلىكتى جوققا شىعارمايدى.
قاداعالاۋ ورگانى زاڭدى كۇشىنە ەنگەن سوت اكتىلەرى قىلمىستان كەلتىرىلگەن م ۇلىكتىك زالالدىڭ تولىق نەمەسە ءىشىنارا وتەلۋىنە قاراماستان، كىنالىلەردى قىلمىستىق جاۋاپكەرشىلىكتەن بوساتپايتىنىن راستايتىنىن اتاپ ءوتتى.
ازاماتتاردى ساق بولۋعا جانە كۇماندى پايدا تابۋ سحەمالارىن ۇسىناتىن ادامدارعا سەنبەۋگە شاقىردى.