مالايزيانىڭ بورنەو ارالىنداعى اۋماعىندا «ۇشقىش دارىگەر» قىزمەتىن اتقارعان تىكۇشاق اپاتىنان قازا تاپقان بەس ادامنىڭ سۇيەگى تابىلدى. بۇل تۋرالى infohub.kz سايتى حابارلايدى.
سارسەنبىدە قۇتقارۋشىلار اپات بولعان ۇشاقتاعى بارلىق بەس ادامنىڭ ءمايىتىن تاۋىپ الدى. تىكۇشاق مالايزيانىڭ ساراۆاك شتاتىنداعى لونگ لەلانگ اۋەجايىنىڭ ماڭىندا اپاتقا ۇشىراعان ەدى. ساراۆاك — مالايزيانىڭ ەڭ ءىرى شتاتى، ونىڭ اۋماعىنىڭ باسىم بولىگى شالعاي اۋدانداردان تۇرادى، وندا مەديسينالىق كومەك الۋ قيىنعا سوعادى. «ۇشقىش دارىگەر» قىزمەتى وسىنداي وقشاۋ ايماقتارعا مەديسينالىق بريگادالاردى جەتكىزۋدى كوزدەيدى.
اۋە اپاتىنان قازا تاپقان ۇشقىش پەن ءتورت مەديسينا قىزمەتكەرىنىڭ جەكە باسىن انىقتاۋ ءراسىمى باستالدى. اپاتتىڭ سەبەبى ازىرگە جاريالانعان جوق، سونداي-اق اۋا رايى جاعدايىنىڭ اسەر ەتكەن-ەتپەگەنى دە بەلگىسىز. سوڭعى اپتالاردا ساراۆاكتا كورشىلەس يندونەزياداعى ورمان ورتتەرىنەن تۋىنداعان ءتۇتىن بايقالۋدا. تەرگەۋ جۇمىستارى جۇرگىزىلۋدە.
پرەمەر-مينيستر انۆار يبراگيم سارسەنبىدە قايعىلى وقيعاعا بايلانىستى كوڭىل ايتىپ، تەرگەۋ اياقتالعانشا بولجام جاساماۋعا شاقىردى. ول ۇكىمەت زارداپ شەككەن وتباسىلارعا بارلىق قاجەتتى كومەك پەن قولداۋ كورسەتەتىنىن مالىمدەدى.
ساراۆاك ۇكىمەتى قۇربانداردىڭ وتباسىلارىنا اقشالاي كومەك كورسەتىلەتىنىن جانە ولاردىڭ بالالارىنىڭ وقۋ اقىسىن تولەۋگە ۋادە بەردى.