مالتا مەن كورشىلەس گوزو ارالىندا ەلەكترمەن جابدىقتاۋدا ءىرى اقاۋ ورىن الىپ، 30 ەلدى مەكەننىڭ تۇرعىندارى جارىقسىز قالدى، دەپ حابارلايدى infohub.kz سايتى.
Bild باسىلىمىنىڭ مالىمەتىنشە، مالتالىقتار بۇل ماسەلەگە كەشە كۇندىز تاپ بولعان. جەرگىلىكتى Enemalta وپەراتورىنىڭ دەرەگىنشە، سۇيىتىلعان تابيعي گاز قوندىرعىسىنداعى جابدىقتىڭ كەنەتتەن توقتاۋىنان تۇرعىندار ەلەكتر قۋاتىنسىز قالدى. بۇكىل ەنەرگوجۇيەنىڭ تۇراقتىلىعىن ساقتاۋ ءۇشىن ءبىرقاتار اۋداندا جارىقتى ۋاقىتشا وشىرۋگە تۋرا كەلدى.
ەلەكترمەن جابدىقتاۋداعى ۇزىلىستەر تۋرالى تۇرعىندار مەن تۋريستەر جاپپاي حابارلاعان. ولار ۇيلەر مەن قوناقۇيلەردە كونديسيونەرلەردىڭ وشكەنىن، جاعاجايداعى بارلاردا تەلەديدارلاردىڭ جۇمىسىن توقتاتقانىن شاعىمداندى.
كوپ ۇزاماي جابدىقتاۋدى قالپىنا كەلتىرۋ ءۇشىن رەزەرۆتىك قۋات كوزدەرى ىسكە قوسىلدى. كەيبىر ەلدى مەكەندەردە ەلەكتر شامامەن ءبىر ساعاتتان كەيىن قايتا بەرىلدى. Enemalta ەنەرگيا وندىرەتىن نىسانداعى اقاۋدىڭ سەبەبىن ءالى تەرگەپ جاتىر.
بەلگىلى بولعانداي، بۇل مالتا ءۇشىن سوڭعى اپتالارداعى العاشقى اۋىر بلەكاۋت ەمەس. تامىز ايىنىڭ سوڭىندا گوزو ارالى بىرنەشە جوعارى ۆولتتى جەلىدەگى اقاۋلارعا بايلانىستى 26 ساعات ەلەكترسىز قالعان. بيلىك زارداپ شەككەندەرگە وتەماقى تولەۋگە ۋادە بەردى.
جالپى، بيىل جازدا ارالداردا ەلەكتر ۇزىلىستەرى ادەتتەگىدەن ءجيى بولدى. تۋريستىك ماۋسىمدا تۇتىنۋدىڭ ءوسۋى اياسىندا مالتادا ەنەرگوجۇيەنىڭ جۇكتەمەگە توتەپ بەرە الاتىنى الدەقاشان تالقىلانىپ ءجۇر.