اقتاۋدا وبلىستىق اۋرۋحانادا جىل باسىندا بولعان 13 جاسار بالانىڭ قايتىس بولۋىنا قاتىستى مەديسينالىق مەكەمەنىڭ حيرۋرگى ۇستالدى، دەپ حابارلايدى infohub.kz سايتى.
ماڭعىستاۋ وبلىسى پوليسيا دەپارتامەنتىنىڭ مالىمەتىنشە، 1 قازاندا وبلىستىق بالالار اۋرۋحاناسىنىڭ حيرۋرگى قازاقستان قىلمىستىق ءىس جۇرگىزۋ كودەكسىنىڭ 128-بابىنا سايكەس ۇستالدى. ول ۋاقىتشا ۇستاۋ يزولياتورىنا قامالدى.
تەرگەۋ بارىسىندا وبلىستىق بالالار اۋرۋحاناسىندا بالاعا مەديسينالىق كومەك كورسەتۋ كەزىندە ۇيىمداستىرۋ-تاكتيكالىق جانە ەمدەۋ-دياگنوستيكالىق سيپاتتاعى كەمشىلىكتەرگە جول بەرىلگەنى انىقتالدى.
كامەلەتكە تولماعان بالانىڭ جاعدايى ناشارلاعان سوڭ ونى سانيتارلىق اۆياسيامەن اقتاۋدان الماتىعا جەتكىزگەن. الايدا كەيىن بالا قايتىس بولدى.
«قىلمىستىق ءىس اياسىندا قاجەتتى تەرگەۋ ارەكەتتەرى جۇرگىزىلىپ، مەديسينا قىزمەتكەرلەرى جاۋاپقا تارتىلدى، كوميسسيالىق سوت-مەديسينالىق ساراپتامالار تاعايىندالدى. كوميسسيالىق سوت-مەديسينالىق ساراپتاما قورىتىندىسىنا سايكەس، كامەلەتكە تولماعان بالاعا مەديسينالىق كومەك كورسەتۋ كەزىندە اسقىنۋلاردىڭ دامۋىنا ىقپال ەتۋى مۇمكىن كەمشىلىكتەر انىقتالدى»، — دەدى پوليسيادا.
ۆەدومستۆونىڭ حابارلاۋىنشا، قازىرگى تاڭدا سوتقا دەيىنگى تەرگەۋ جالعاسۋدا. بولعان وقيعانىڭ بارلىق ءمان-جايىن انىقتاۋعا باعىتتالعان تەرگەۋ شارالارىنىڭ كەشەنى جۇرگىزىلۋدە. تەرگەۋ مۇددەسى ءۇشىن وزگە اقپارات جاريا ەتىلمەيدى.
ەسكە سالايىق، بۇعان دەيىن اقتاۋ تۇرعىنى جۇلدىز ازانوۆا دارىگەرلىك قاتەلىك تۋرالى مالىمدەپ، ونىڭ سالدارىنان 13 جاسار ۇلى اۋىر جاعدايعا ءتۇسىپ، كەيىن قايتىس بولعانىن ايتقان بولاتىن. ايەل قازاقستان پرەزيدەنتىنە جۇگىنگەن. ونىڭ ايتۋىنشا، ءبارى 17 قاڭتاردا ۇلىنىڭ ءىشى كەنەتتەن اۋىرا باستاعانىنان باستالعان.
ساۋىردە دەنساۋلىق ساقتاۋ مينيسترلىگى بالانىڭ اۋرۋحانادا قايتىس بولۋىنان كەيىن ماڭعىستاۋ وبلىسىنىڭ اۋرۋحاناسى مەن ەمحاناسىندا جوسپاردان تىس تەكسەرۋلەر جۇرگىزىلىپ، ءبىرقاتار بۇزۋشىلىقتار انىقتالعانىن مالىمدەدى.
تامىزدا قازاقستان رەسپۋبليكاسىنىڭ دەنساۋلىق ساقتاۋ ءمينيسترى اقمارال ءالنازاروۆا ماڭعىستاۋداعى 13 جاسار بالانىڭ قايتىس بولۋىنا قاتىستى پىكىر ءبىلدىردى. مينيستر ءجاسوسپىرىمنىڭ اناسىمەن كەزدەسەتىنىن ۋادە ەتتى.