كاسپي تەڭىزىندەگى وقۋ-جاتتىعۋ كەزىندە امان قالعان اسكەري قىزمەتشىلەردىڭ ءبىرى ماڭعىستاۋ وبلىستىق كوپبەيىندى اۋرۋحاناسىندا جاتىر. وعان قاجەتتى مەديسينالىق كومەكتىڭ بارلىعى كورسەتىلۋدە، دەپ حابارلايدى infohub.kz سايتى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، ناۋقاس دارىگەرلەردىڭ تۇراقتى باقىلاۋىندا. «ناۋقاس دارىگەرلەردىڭ تۇراقتى باقىلاۋىندا. وعان قاجەتتى مەديسينالىق كومەك تولىق كولەمدە كورسەتىلۋدە. اسكەري قىزمەتشىنىڭ جاعدايى قازىرگى تاڭدا تۇراقتى اۋىر دەپ باعالانۋدا»، — دەلىنگەن حابارلامادا.
ماماندار قاجەتتى ەمدەۋدى جالعاستىرىپ، ناۋقاستىڭ جاعدايىن باقىلاۋدا ۇستاۋدا. احۋال ماڭعىستاۋ وبلىستىق دەنساۋلىق ساقتاۋ باسقارماسىنىڭ باقىلاۋىندا.
ەسكە سالايىق، 24 قىركۇيەكتە ماڭعىستاۋ وبلىسىندا ق ر قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى بارىسىندا كاسپي تەڭىزى جاعالاۋىندا وقۋ-جاۋىنگەرلىك مىندەتتى ورىنداۋ كەزىندە اۋا رايىنىڭ كۇرت ناشارلاۋى مەن جەلدىڭ كۇشەيۋىنە بايلانىستى اسكەري قىزمەتشىلەردى تەڭىزگە اعىزىپ اكەتكەن.
قورعانىس مينيسترلىگىنىڭ الدىن الا مالىمەتىنشە، تەڭىزگە 19 اسكەري قىزمەتشى اعىزىلىپ كەتكەن. قازىرگى ۋاقىتتا 9 اسكەري قىزمەتشىنىڭ قازا تاپقانى تىركەلدى.
باس پروكۋراتۋرا اقتاۋ گارنيزونىنداعى وقۋ-جاتتىعۋ كەزىندە اسكەري قىزمەتشىلەردىڭ قازا تابۋى فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن حابارلادى. اقتاۋلىق بلوگەر ازامات سارسەنبايەۆ ماڭعىستاۋ وبلىسىنداعى توتەنشە جاعداي ورنىنان ۆيدەو جاريالادى.
اسكەري قىزمەتشىلەر قازا تاپقاننان كەيىن ۇكىمەتتىك كوميسسيا قۇرىلىپ، وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى. پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، تراگەديانى تەرگەۋ جونىندە تاپسىرمالار بەردى.
اقتاۋدا قالا كۇنىنە وراي مەرەكەلىك شارالار توقتاتىلدى. پرەزيدەنت قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
24 قىركۇيەك كەشىندە پرەمەر-مينيستردىڭ ورىنباسارى قانات بوزىمباەۆتىڭ باسشىلىعىمەن كوميسسيا ماڭعىستاۋ وبلىسىنا كەلدى.