كاسپي تەڭىزىندەگى اسكەري وقۋ-جاتتىعۋ كەزىندە قازا تاپقان ساربازداردىڭ تۋىستارى اقتاۋداعى قالالىق ءمايىتحانانىڭ الدىنا جينالدى، ءبىراق ۇلدارىن ءوز كوزدەرىمەن كورە المادى. كەيبىرەۋلەرىنىڭ اسكەري قىزمەتتەن بوساۋىنا ساناۋلى كۇن قالعان ەدى. بۇل تۋرالى قازا تاپقان اسكەري قىزمەتشىلەردىڭ ءبىرىنىڭ اكەسى ايتتى، دەپ حابارلايدى infohub.kz سايتى.
«ۇيىمە وسى جاڭالىقپەن كەلدى. اكىمدىكتەن، ۋچاسكەلىك پوليسەي كەلدى. «كەشىرىڭىز، ءسىزدىڭ ۇلىڭىز ءاتى-جونى وسى ما؟ ول ءمايىتحانادا»، – دەدى. ءبىراق مەن بۇل مەنىڭ ۇلىم با، جوق پا، ءالى بىلمەيمىن. ەشكىم ەشقانداي اقپارات بەرمەيدى، ەشكىم شىقپايدى!» – دەدى جۋرناليستەرگە رەسمي ءتىزىم جاريالانعانعا دەيىن قازا تاپقانداردىڭ ءبىرىنىڭ اكەسى ءجۇسىپ ورازالي.
وسى قايعىلى وقيعاعا بايلانىستى قازاقستاندىقتار 11 جىل بۇرىن كاسپيدە بولعان توتەنشە جاعدايدى ەسكە الۋدا. سول كەزدە دە وقۋ-جاتتىعۋ بارىسىندا تەڭىز دەسانتىن ءتۇسىرۋ كەزىندە التى بتر تەڭىزگە شىققان. «ولاردى تولقىن قاپتاپ، تەك ەكى ماشينا عانا جاعاعا شىعا الدى. قالعاندارى اسكەري قىزمەتشىلەرمەن بىرگە سۋعا كەتتى. سوندا ءتورت ادام قازا تاپتى. قىزمەتكە نەمقۇرايلى قاراۋعا كىنالى دەپ التى كوماندير تانىلدى. ولار ءبىر جارىمنان ەكى جىلعا دەيىن كولونيا-پوسەلەنيەدە جانە شارتتى تۇردە جازا الدى»، – دەلىنگەن كتك تەلەارناسىنىڭ سيۋجەتىندە.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرىنىڭ وقۋ-جاتتىعۋى كەزىندە كاسپي تەڭىزىنىڭ جاعالاۋىندا اۋا رايىنىڭ كۇرت ناشارلاۋى مەن جەلدىڭ كۇشەيۋىنە بايلانىستى اسكەري قىزمەتشىلەر تەڭىزگە اعىزىلىپ كەتتى.
العاشىندا تەڭىزگە 19 اسكەري قىزمەتشى اعىزىلىپ كەتكەنى جانە 9 اسكەري قىزمەتشىنىڭ قازا تاپقانى بىردەن راستالعانى حابارلاندى. باس پروكۋراتۋرا اقتاۋ گارنيزونىندا قىلمىستىق ءىس قوزعالىپ، تەرگەلىپ جاتقانىن مالىمدەدى.
اسكەري قىزمەتشىلەر قازا تاپقاننان كەيىن ۇكىمەتتىك كوميسسيا قۇرىلىپ، توتەنشە جاعداي ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى. قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىنداعى اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى.
اقتاۋدا قالا كۇنىنە وراي مەرەكەلىك ءىس-شارالار توقتاتىلدى. قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى. كوپ ۇزاماي پرەمەر-مينيستردىڭ ورىنباسارى قانات بوزىمباەۆتىڭ باسشىلىعىمەن كوميسسيا ماڭعىستاۋ وبلىسىنا كەلدى. كاسپي تەڭىزىندەگى وقۋ-جاتتىعۋ كەزىندە قازا تاپقانداردىڭ تۋىستارى مايىتتەردى سايكەستەندىرۋ ءۇشىن اقتاۋداعى ءمايىتحاناعا كەلدى.
24 قىركۇيەك كەشىندە ناقتىلانعان دەرەكتەر بەلگىلى بولدى. تەڭىزگە 17 ادام اعىزىلىپ كەتتى، ولاردىڭ 12ء-سى قازا تاپتى، ۇشەۋىن قۇتقارۋ مۇمكىن بولدى. قالعان ەكى اسكەري قىزمەتشىنى ىزدەۋ جالعاسۋدا.
سونداي-اق قورعانىس مينيسترلىگى كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ ءتىزىمىن جاريالادى. تىزىمگە 11 ماتروس جانە ءبىر اعا لەيتەنانت ەندى.
سونىمەن قاتار، قانات بوزىمبايەۆ كاسپي تەڭىزىندەگى قايعىلى وقيعاعا كىنالى بارلىق لاۋازىمدى تۇلعالار «ارەكەت نەمەسە ارەكەتسىزدىك» ءۇشىن جازالاناتىنىن ۋادە ەتتى.