ماڭعىستاۋ وبلىسىنداعى وقۋ-جاتتىعۋ كەزىندە اسكەري قىزمەتشىلەردىڭ قازا تابۋىنا بايلانىستى قىزمەتكە نەمقۇرايلى قاراۋ جانە كەمە جۇرگىزۋ ەرەجەلەرىن بۇزۋ فاكتىسى بويىنشا قىلمىستىق ءىس قوزعالدى. بۇل تۋرالى ۇكىمەتتىك كوميسسيا وتىرىسىندا ىشكى ىستەر ءمينيسترىنىڭ ورىنباسارى سانجار ءادىلوۆ باياندادى، دەپ حابارلايدى infohub.kz سايتى.
ءسوز قازاقستان رەسپۋبليكاسى قىلمىستىق كودەكسىنىڭ 453-بابىنىڭ 2-بولىگى («قىزمەتكە نەمقۇرايلى قاراۋ، اۋىر زارداپتارعا اكەپ سوققان») جانە 465-بابى («كەمە جۇرگىزۋ ەرەجەلەرىن بۇزۋ») تۋرالى بولىپ وتىر. تەرگەۋ اياسىندا ۆەدومستۆوارالىق جەدەل-تەرگەۋ توبى قۇرىلىپ، تەرگەۋ جانە جەدەل-ىزدەستىرۋ ءىس-شارالارىنىڭ كەشەنى جۇرگىزىلۋدە، ماماندار تارتىلىپ، قاجەتتى سوت ساراپتامالارى تاعايىندالدى.
قازاقستان پرەمەر-مينيسترىنىڭ ورىنباسارى قانات بوزىمبايەۆ بولعان وقيعانىڭ بارلىق ءمان-جايىن تولىق كولەمدە قىسقا مەرزىمدە انىقتاۋدى جانە تراگەدياعا كىنالى ادامدارعا شارا قولدانۋدى تاپسىردى.
وتىرىستا قازا تاپقان اسكەري قىزمەتشىلەردىڭ وتباسىلارىنا ەرەكشە نازار اۋدارىلدى. پرەمەر-مينيستردىڭ ورىنباسارى مەملەكەت ولارعا قاجەتتى الەۋمەتتىك جانە ماتەريالدىق قولداۋ كورسەتەتىنىن اتاپ ءوتتى.
«زاڭ بويىنشا تيەسىلى ماتەريالدىق كومەكتەن بولەك، كومەك كورسەتكىسى كەلەتىندەردەن كوپتەگەن ءوتىنىش تۇسۋدە. قازاقستان حالقى كەڭەسىنىڭ مۇشەلەرى قازا تاپقانداردىڭ وتباسىلارىنا ماتەريالدىق كومەك كورسەتەتىنىن مالىمدەدى، ولاردىڭ ءبىرى ءاربىر قازا تاپقان اسكەري قىزمەتشىنىڭ وتباسىنا 25 ملن تەڭگەدەن ءبولدى. ءىرى بيزنەس وكىلدەرىنىڭ ءبىرقاتارى دا ماتەريالدىق كومەك كورسەتۋگە نيەت ءبىلدىردى»، — دەدى پرەمەر-مينيستردىڭ ورىنباسارى.
قانات بوزىمبايەۆ ەڭبەك جانە حالىقتى الەۋمەتتىك قورعاۋ مينيسترلىگىنە ماڭعىستاۋ وبلىسىنىڭ اكىمدىگىمەن بىرلەسىپ، قازا تاپقانداردىڭ وتباسىلارىنا جىبەرىلەتىن بارلىق قاراجاتتىڭ ءبولىنۋىنىڭ اشىقتىعى مەن باقىلاۋىن قامتاماسىز ەتۋدى تاپسىرىپ، كومەك ناقتى ءارى تولىق كولەمدە كورسەتىلۋى ءتيىس ەكەنىن اتاپ ءوتتى.
دەنساۋلىق ساقتاۋ ۆيسە-مينيسترى ماناس رامازانوۆ بايانداعانداي، وقيعادان كەيىن مەديسينالىق مەكەمەگە جەتكىزىلگەن اسكەري قىزمەتشىنىڭ جاعدايى تۇراقتى. ونىڭ ومىرىنە ءقاۋىپ جوق، وعان قاجەتتى مەديسينالىق كومەك كورسەتىلۋدە.
وتىرىسقا ىشكى ىستەر، توتەنشە جاعدايلار، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، كولىك مينيسترلەرىنىڭ ورىنباسارلارى، ق ر ۇقك شەكارا قىزمەتى ديرەكتورىنىڭ ورىنباسارى، باس اسكەري پروكۋرور جانە ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ، بايانداما جاسادى. ۇكىمەتتىك كوميسسيانىڭ جۇمىسى جالعاسۋدا.
كاسپيدەگى تراگەديا 24 قىركۇيەكتە وقۋ-جاتتىعۋ كەزىندە بولدى. اۋا رايى ناشارلاعاندا تەڭىزگە 17 اسكەري قىزمەتشى اعىپ كەتتى. ون ەكى ادام قازا تاپتى، ۇشەۋى قۇتقارىلدى، قالعان ەكەۋىن ىزدەۋ جالعاسۋدا.
اسكەري قىزمەتشىلەردىڭ قازا تابۋى فاكتىسى بويىنشا قازاقستان باس پروكۋراتۋراسى قىلمىستىق ءىس قوزعادى. بۇعان دەيىن ەلدىڭ قورعانىس مينيسترلىگى قازا تاپقان اسكەريلەردىڭ تولىق ءتىزىمىن جاريالاعان بولاتىن.
پرەزيدەنت قاسىم-جومارت توقايەۆ قازا تاپقانداردىڭ وتباسىلارىنا كومەك كورسەتۋدى تاپسىرىپ، 25 قىركۇيەكتى جالپىۇلتتىق ازا تۇتۋ كۇنى دەپ جاريالادى.