جيىرما ءتورتىنشى قىركۇيەكتە ماڭعىستاۋ وبلىسىندا، اقتاۋدان 43 شاقىرىم جەردە، قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاتتىعۋ وتكىزىپ جاتقاندا قايعىلى وقيعا بولدى: كاسپي تەڭىزىنە 19 اسكەري قىزمەتشىنى اعىزىپ اكەتتى. بۇل تۋرالى قازاقستان رەسپۋبليكاسى قورعانىس مينيسترلىگىنە سىلتەمە جاساپ، infohub.kz سايتى حابارلادى.
قورعانىس ۆەدومستۆوسىنىڭ تۇسىندىرۋىنشە، اسكەريلەر كاسپي تەڭىزىنىڭ جاعالاۋىندا وقۋ-جاۋىنگەرلىك تاپسىرمانى ورىنداپ جاتقان. سول كەزدە اۋا رايى كۇرت ناشارلاپ، جەل كۇشەيگەننەن كەيىن ولاردى تەڭىزگە اعىزىپ اكەتكەن.
الدىن الا دەرەكتەرگە قاراعاندا، تەڭىزدە 19 اسكەري قىزمەتشى بولعان. قازىرگى تاڭدا ولاردىڭ توعىزىنىڭ قازا تاپقانى تىركەلدى.
ءۇش اسكەري قۇتقارىلدى، ولاردىڭ بىرەۋى اۋرۋحاناعا جات قىزىلدى. قالعاندارىن ىزدەۋ جالعاسۋدا. وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى دەرەۋ جىبەرىلدى. ىزدەۋ-قۇتقارۋ وپەراسياسىنا اسكەري-تەڭىز كۇشتەرىنىڭ، توتەنشە جاعدايلار مينيسترلىگىنىڭ بولىمشەلەرى، اۆياسيا جانە باسقا دا ءتيىستى قىزمەتتەر جۇمىلدىرىلدى.
وقيعانىڭ بارلىق ءمان-جايىن انىقتاۋ جانە ىزدەۋ-قۇتقارۋ جۇمىستارىن ۇيلەستىرۋ ءۇشىن وقيعا ورنىنا قورعانىس ءمينيسترى، اۆياسيا گەنەرال-لەيتەنانتى داۋرەن قوسانوۆ باستاعان قورعانىس مينيسترلىگىنىڭ كوميسسياسى شۇعىل اتتاندى.
قازاقستان رەسپۋبليكاسىنىڭ قورعانىس مينيسترلىگى قازا تاپقان اسكەري قىزمەتشىلەردىڭ تۋعان-تۋىستارىنا قايعىرا كوڭىل ايتتى. قازا تاپقانداردىڭ وتباسىلارىنا قاجەتتى كومەك پەن قولداۋ كورسەتىلەدى.
ىزدەۋ وپەراسياسىنىڭ بارىسى مەن اسكەري قىزمەتشىلەردىڭ جاعدايى تۋرالى قوسىمشا اقپارات دەرەكتەر كەلىپ تۇسكەن جانە راستالعان سايىن بەرىلىپ وتىرادى.
قورعانىس مينيسترلىگى تەك قورعانىس ۆەدومستۆوسى مەن باسقا دا مەملەكەتتىك ورگانداردىڭ رەسمي اقپاراتىنا سۇيەنۋگە شاقىردى.