ماڭعىستاۋ وبلىسىندا وقۋ مادەنيەتىن قالىپتاستىرۋعا جانە جاس ۇرپاقتىڭ رۋحاني-تانىمدىق الەۋەتىن ارتتىرۋعا باعىتتالعان اۋقىمدى باستاما باستالدى. وڭىردە وبلىس اكىمدىگى مەن «كىتاپ وقيتىن ۇلت – چيتايۋششايا ناسيا» قوعامدىق قورى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى، دەپ حابارلايدى infohub.kz.
قۇجاتقا ماڭعىستاۋ وبلىسى اكىمىنىڭ ورىنباسارى اببات ۇرىسبايەۆ پەن «كىتاپ وقيتىن ۇلت – چيتايۋششايا ناسيا» قوعامدىق قورىنىڭ ءتوراعاسى باقىتجان تۇرلىبەكوۆ قول قويدى.
ىنتىماقتاستىقتىڭ باستى ماقساتى – ماڭعىستاۋ وبلىسىندا «وقيتىن ۇلت» رەسپۋبليكالىق مارافونىن بىرلەسىپ ىسكە اسىرۋ، وقۋ مادەنيەتىن كەڭىنەن ناسيحاتتاۋ، وقىرماندىق ورتا قالىپتاستىرۋ جانە قوعامنىڭ ينتەللەكتۋالدىق الەۋەتىن ارتتىرۋ. بۇل باستاما مەملەكەت باسشىسىنىڭ وقۋ مادەنيەتىن دامىتۋعا، بىلىمگە ۇمتىلىستى ارتتىرۋعا جانە ءبىلىمدى ۇلت قالىپتاستىرۋعا باعىتتالعان جارلىعىن ىسكە اسىرۋدىڭ ماڭىزدى تەتىكتەرىنىڭ بىرىنە اينالادى.
كەزدەسۋ بارىسىندا وبلىس اكىمىنىڭ ورىنباسارى اببات ۇرىسبايەۆ «وقيتىن ۇلت» جوباسىنىڭ باستى ماقساتى – حالىق اراسىندا وقۋ مادەنيەتىن ءسىڭىرۋ، وتاندىق ادەبيەتتى ناسيحاتتاۋ جانە ينتەللەكتۋالدى ۇلت قالىپتاستىرۋعا ۇلەس قوسۋ ەكەنىن اتاپ ءوتتى.
«مەملەكەت باسشىسى قاسىم-جومارت كەمەل ۇلى توقايەۆ ەلدە وقۋ مادەنيەتىن قالىپتاستىرۋعا جانە جاس ۇرپاقتىڭ ينتەللەكتۋالدىق الەۋەتىن ارتتىرۋعا ەرەكشە كوڭىل بولەدى. ويتكەنى باسەكەگە قابىلەتتى، شىعارماشىل جانە جاسامپاز تۇلعا تاربيەلەۋدىڭ نەگىزى – ءبىلىم مەن كىتاپ. وسىعان وراي بۇگىنگى باستامانىڭ ماقساتى ايقىن. قوعامدا، اسىرەسە حالىق اراسىندا وقۋ مادەنيەتىن كەڭىنەن ناسيحاتتاۋ، وتاندىق ادەبيەت پەن اعارتۋشىلىق قۇندىلىقتاردى دارىپتەۋ قاجەت. «وقيتىن ۇلت» جوباسىن ماڭعىستاۋ وبلىسىنىڭ بارلىق اۋداندارى مەن قالالارىندا جوعارى دەڭگەيدە ىسكە اسىرۋ جوسپارلانۋدا»، – دەدى اببات ۇرىسبايەۆ.
«كىتاپ وقيتىن ۇلت – چيتايۋششايا ناسيا» قوعامدىق قورىنىڭ ءتوراعاسى باقىتجان تۇرلىبەكوۆ تە جوبانىڭ ماڭىزدىلىعىن اتاپ ءوتتى.
«دانا ۇلت قالىپتاستىرۋ – ءبىر كۇننىڭ نەمەسە ءبىر جوبانىڭ ءىسى ەمەس. بۇل قوعامنىڭ ويلاۋ مادەنيەتىن وزگەرتەتىن ۇزاق مەرزىمدى پروسەسس. ءبىز ءۇشىن بۇل باستامانىڭ كورنەكتى جازۋشى ءابىش كەكىلبايەۆ دۇنيەگە كەلگەن قاسيەتتى توپىراقتا جۇزەگە اسۋى ەرەكشە ماڭىزدى. ماڭعىستاۋ وبلىسىمەن وسى باعىتتا ناتيجەلى جانە مازمۇندى ارىپتەستىك ورنايتىنىنا سەنىمدىمىز»، – دەدى باقىتجان تۇرلىبەكوۆ.
مەموراندۋم اياسىندا وقۋدى ناسيحاتتاۋعا باعىتتالعان ءتۇرلى قوعامدىق-اعارتۋشىلىق ءىس-شارالار، وقىرماندىق باستامالار جانە مارافوننىڭ وڭىرلىك كەزەڭدەرى ۇيىمداستىرىلاتىن بولادى.
جوبانى ىسكە اسىرۋعا قازاقستان جازۋشىلار وداعى، كرەاتيۆتى يندۋستريالاردى دامىتۋ قورى جانە Yandex Qazaqstan كومپانياسى ياندەكس كىتاپتار سەرۆيسىمەن بىرلەسىپ قاتىسۋدا. جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلۋدا.