ماڭعىستاۋ وبلىسىندا ەسەپتە تۇرعان ازامات جازاسىن وتەۋ ءتارتىبىن بىرنەشە رەت بۇزعانى ءۇشىن سوتقا تارتىلدى، دەپ حابارلايدى infohub.kz سايتى.
ۆەدومستۆونىڭ Instagram-داعى رەسمي پاراقشاسىندا حابارلانعانداي، ءتۇپقاراعان اۋداندىق سوتىندا پروباسيا قىزمەتىنىڭ ەسەبىندە تۇرعان سوتتالعانعا قاتىستى كورسەتپەلى سوت وتىرىسى ءوتتى. وعان باسقا دا ەسەپتە تۇرعان ازاماتتار قاتىستى.
قارالعان ماتەريالدارعا سايكەس، سوتتالعان ادام جازاسىن وتەۋ ءتارتىبىن بىرنەشە رەت بۇزعان. اتاپ ايتقاندا، تۇرعىلىقتى جەرى بويىنشا بولماعان، بىرنەشە تاۋلىك بويى ۇيدە كورىنبەگەن، سونداي-اق جۇمىسقا كەتكەنى تۋرالى پروباسيا قىزمەتىنىڭ قىزمەتكەرلەرىن حاباردار ەتپەگەن.
سونىمەن قاتار، پروباسيا قىزمەتىنىڭ ەسەبىندە تۇرعان ادامدار اراسىندا جۇرگىزىلگەن ناركولوگيالىق سكرينينگ بارىسىندا ونىڭ بيولوگيالىق سىناماسىندا ەسىرتكى زاتىنىڭ بەلگىلەرى انىقتالعان.
جىبەرىلگەن بۇزۋشىلىقتارعا بايلانىستى پروباسيا قىزمەتى سوتقا جازاسىنىڭ وتەلمەگەن بولىگىن باس بوستاندىعىنان ايىرۋمەن الماستىرۋدى سۇراپ ۇسىنىس ەنگىزگەن.
سوت ماتەريالداردى قاراپ، پروباسيا قىزمەتىنىڭ ۇسىنىسىن قاناعاتتاندىردى.
سوت شەشىمىنە سايكەس، سوتتالعان ادام سوت زالىندا قاماۋعا الىنىپ، جازاسىنىڭ قالعان بولىگىن وتەۋ ءۇشىن قىلمىستىق-اتقارۋ جۇيەسى مەكەمەسىنە جىبەرىلدى.