ماڭعىستاۋ وبلىسىنداعى توتەنشە جاعداي تۋرالى الەۋمەتتىك جەلىلەردە جالعان اقپارات تاراتقانى ءۇشىن قازاقستاننىڭ ءتورت تۇرعىنى اكىمشىلىك جاۋاپكەرشىلىككە تارتىلدى، دەپ حابارلايدى infohub.kz سايتى.
پوليسيانىڭ مالىمەتىنشە، د.س. جانە گ.س. دەگەن ازاماتشالار Facebook جەلىسىندە اسكەري قىزمەتشى ا.ا. تۋرالى جازبا جاريالاعان. ولار ەر ادام سۋعا باتىپ بارا جاتقان جولداسىن ءوزى قۇتقارىپ، جاعاعا شىققانىن، ال وقيعانىڭ ءمان-جايى مەن ونىڭ ءىسى ادەيى جاسىرىلىپ وتىرعانىن العا تارتقان.
تەكسەرۋ بارىسىندا د.س. بۇل مالىمەتتى الىس تۋىستارىنان ەستىگەنىن ءتۇسىندىردى. گ.س. اقپاراتتى الەۋمەتتىك جەلىدەن تاۋىپ، راستىعىن تەكسەرمەي ءوز پاراقشاسىندا جاريالاعانىن ايتتى.
قورعانىس مينيسترلىگى بۇل حابارلامالاردى رەسمي تۇردە جوققا شىعاردى. ۆەدومستۆونىڭ دەرەگىنشە، وقۋ-جاتتىعۋ كەزىندە ا.ا. جاعاجايدا بولىپ، وقۋ باعدارلاماسىندا كوزدەلگەن مىندەتتەردى ورىنداعان. ونىمەن بىرگە مەرزىمدى اسكەري قىزمەتتەگى ماتروس م.ءا. دە بولعان. ەكى اسكەري قىزمەتشى دە اسكەري ءبولىم ورنالاسقان جەردە قىزمەتىن جالعاستىرۋدا.
سونىمەن قاتار پوليسيا وقيعا تۋرالى جالعان مالىمەت تاراتقان شىمكەنت تۇرعىنى س.ك. مەن كوكشەتاۋ تۇرعىنى ك.و-نى دا انىقتادى. ايەل Facebook جەلىسىندە تاعى ءبىر اسكەري قىزمەتشى قازا تاپقانى، ونىڭ تۋىستارىنا قىسىم كورسەتىلىپ، اقشا تالاپ ەتىلگەنى تۋرالى جازعان. ەر ادام ماڭعىستاۋ وبلىسىندا تاعى ءبىر اسكەري قىزمەتشىنىڭ قازا تاپقانى تۋرالى جالعان اقپارات جاريالاعان.
سوت ءتورت ازاماتتىڭ بارلىعىن اكىمشىلىك جاۋاپكەرشىلىككە تارتتى. ولارعا 20 ايلىق ەسەپتىك كورسەتكىش مولشەرىندە ايىپپۇل سالىندى.
پوليسيا بوتەن ماتەريالداردى قايتا جاريالاۋ مەن سىرتقى دەرەككوزگە سىلتەمە جاساۋ تەكسەرىلمەگەن مالىمەت تاراتقانى ءۇشىن جاۋاپكەرشىلىكتەن بوساتپايتىنىن ەسكە سالدى.
بۇعان دەيىن «كۋرسيۆ» پەتروپاۆل بلوگەرى يرينا انتونەنكو كاسپيدەگى وقۋ-جاتتىعۋ كەزىندە قازا تاپقان 14 اسكەري قىزمەتشىنى ەسكە الۋ كۇنى تىكەلەي ەفير جۇرگىزگەنى ءۇشىن 10 تاۋلىك اكىمشىلىك قاماۋعا الىنعانىن جازعان. پوليسيا رەداكسيانىڭ ساۋالىنا بەرگەن جاۋابىندا ونىڭ ارەكەتى ۇساق بۇزاقىلىق دەپ سارالانعانىن مالىمدەدى.