قازاقستاننىڭ ۇلتتىق ەكونوميكا مينيسترلىگى تۇركىستان وبلىسى تولەبي اۋدانىنىڭ كاسىپكەرلەرىمەن جۇمىس كەزدەسۋىندە بۇرىنعى كولىك ءمينيسترى مارات قاراباەۆقا تيەسىلى كومپانيانىڭ ينۆەستيسيالىق جوباسىن ۇلگى رەتىندە كورسەتتى، دەپ حابارلايدى infohub.kz سايتى.
جەرگىلىكتى بيزنەس وكىلدەرىنىڭ الدىندا سويلەگەن ۇلتتىق ەكونوميكا ۆيسە-مينيسترى ەرلان ساعنايەۆ «QazCoilPro» ءجشس-نىڭ اليۋميني رۋلوندارىن شىعاراتىن زاۋىتىنىڭ قۇرىلىسىن ەرەكشە اتاپ ءوتتى. بۇل ونەركاسىپ نىسانىنا سالىناتىن ينۆەستيسيانىڭ جالپى كولەمى 115 ملرد تەڭگەگە باعالانىپ وتىر. كاسىپورىن كيەلىتاس اۋىلدىق وكرۋگىندەگى 24 گەكتار جەرگە ورنالاسىپ، وندا 120 جاڭا جۇمىس ورنى اشىلادى.
Adata كونتراگەنتتەردى تەكسەرۋ سەرۆيسىنىڭ دەرەگىنشە، «QazCoilPro» ءجشس-نىڭ قۇرىلتايشىلارى — مارات قارابايەۆ پەن رۋستام سۋحوۆ. كولىك مينيسترلىگىنىڭ بۇرىنعى باسشىسى كومپانيا جەتەكشىسى قىزمەتىنە 2025 جىلدىڭ تامىزىندا، مەملەكەتتىك قىزمەتتەن كەتكەنىنەن ەكى اي وتكەن سوڭ، رەسمي تۇردە كىرىستى. مينيسترلىك وكىلدەرى ەكس-شەنەۋنىكتىڭ جوباسىمەن قاتار KazPlast تىگىن فابريكاسىنىڭ (ينۆەستيسياسى 1،5 ملرد تەڭگە)، Fish House بالىق شارۋاشىلىعىنىڭ جانە ABZAL GROUP قۇس سويۋ پۋنكتىنىڭ جۇمىسىن دا اتادى.
كاسىپكەرلەرمەن ديالوگ بارىسىندا قارجىلىق ىنتالاندىرۋدىڭ وزەكتى قۇرالدارى تالقىلاندى. 31 تامىزدان باستاپ الەۋمەتتىك كاسىپكەرلەردىڭ «ىسكەر ايماق» جەڭىلدىكتى باعدارلاماسىنا قاتىسۋىنا سالالىق شەكتەۋلەر تولىعىمەن الىندى.
بيزنەسكە 200 ملن تەڭگەگە دەيىنگى (وتەۋ مەرزىمى ءۇش جىلعا دەيىن) قارىزدار بويىنشا سىياقىنىڭ نومينالدى مولشەرلەمەسىنىڭ 50%-ىنا دەيىن سۋبسيديالاۋ مۇمكىندىگى بەرىلدى. سونىمەن قاتار باعدارلاما 5 ملن تەڭگەگە دەيىنگى گرانتتار بەرۋدى، جەڭىلدىكتى ۇي-جايلارمەن قامتاماسىز ەتۋدى جانە قارجىلىق ەمەس قولداۋدى كوزدەيدى. رەتتەۋشىلىك راسىمدەردى جەڭىلدەتۋ ءۇشىن ۆەدومستۆو جاساندى ينتەللەكت نەگىزىندەگى مىندەتتى تالاپتار ءتىزىلىمىن ەنگىزدى. بۇل قۇرال كاسىپكەرلەرگە بارلىق سالالىق زاڭنامالىق شەكتەۋلەردى ءبىر جەردەن جىلدام تابۋعا مۇمكىندىك بەرەدى.
مارات قارابايەۆ قازاقستاننىڭ كولىك ءمينيسترى قىزمەتىن 2023 جىلدىڭ قىركۇيەگىنەن باستاپ اتقارىپ، 2024 جىلدىڭ اقپانىندا قايتا تاعايىندالدى. ۇكىمەت قۇرامىندا جۇمىس ىستەگەن كەزەڭدە قارابايەۆ ەل باسشىلىعىنىڭ سىنىنا ۇشىراپ، جۇمىستاعى كەمشىلىكتەرى ءۇشىن پرەزيدەنت قاسىم-جومارت توقاەۆتان رەسمي سوگىس الدى. 2025 جىلدىڭ 8 ماۋسىمىندا ول مەملەكەتتىك قىزمەتتەن كەتتى.
2026 جىلدىڭ ساۋىرىندە ەكس-مينيستردىڭ ءىرى وندىرىستىك سەكتورعا اۋىسۋى اقپارات كەڭىستىگىندە قىزۋ تالقىلاندى. بۇرىن مەملەكەت باسشىسىنان جاريا سوگىس العان ەكس-شەنەۋنىكتىڭ ەلدىڭ وڭتۇستىگىندە قۇنى 115 ملرد تەڭگە بولاتىن زاۋىت قۇرىلىسىن باستاعانى اتاپ ءوتىلدى.