اقش مەملەكەتتىك حاتشىسى ماركو رۋبيو دۇيسەنبى كۇنى بۇۇ باس اسسامبلەياسىنا قاتىسۋ ءۇشىن نيۋ-يورككە كەلگەن يران دەلەگاسياسىنان ەلدەن دەرەۋ كەتۋدى تالاپ ەتتى. بۇل — كەلىسسوزدەر تۇيىققا تىرەلگەن سوڭ قابىلدانعان شارا. اقپاراتتى اقش شەنەۋنىكتەرىنە سىلتەمە جاساپ، infohub.kz سايتى حابارلادى.
Axios دەرەگىنشە، رۋبيونىڭ بۇل قادامى ديپلوماتيالىق تۇرعىدان اسا سيرەك كەزدەسەتىن ەسكەرتۋ بولدى جانە ەكى ەل اراسىنداعى تەرەڭ سەنىمسىزدىكتى ايقىن كورسەتتى.
كاتارلىق دەلدالدار اقش پەن يران اراسىندا ديپلوماتيالىق سەرپىلىس جاساۋعا تىرىسقان، الايدا ەكى تاراپ تا جەڭىلمەۋگە بەل بۋعاندىقتان، ناتيجە ماردىمسىز بولدى.
نيۋ-يوركتەن كەتۋگە بۇيرىق العانداردىڭ قاتارىندا يران سىرتقى ىستەر ءمينيسترى ابباس اراگچي دە بولدى.
«دۇيسەنبى تاڭەرتەڭ اق ءۇي يرانمەن كۇندىزگى كەلىسسوزدەر بارىسىندا ىلگەرىلەۋ بولۋى مۇمكىن دەپ ەسەپتەدى. الايدا كۇن سوڭىندا كەلىسسوزدەردىڭ تۇيىققا تىرەلگەنى بەلگىلى بولدى. دۇيسەنبى كەشكە رۋبيونىڭ بۇيرىعىمەن اقش-تىڭ بۇۇ جانىنداعى وكىلدىگى يران وكىلدىگىنە اراگچي دەلەگاسياسىنىڭ نيۋ-يوركتەن دەرەۋ كەتۋى كەرەكتىگىن جەتكىزدى»، — دەيدى دەرەككوز.
ەسكە سالايىق، بۇعان دەيىن كاتار وكىلدەرى وسى اپتادا اقش پەن يران اراسىنداعى قاقتىعىستى رەتتەۋدە سەرپىلىس جاساي الماعانى حابارلانعان بولاتىن.