قازاقستاندىق سپورتشى ماريان جۋراۆلەۆا ازيا ويىندارىنىڭ ءۇش دۇركىن جۇلدەگەرى اتاندى. جاپونيا قابىلداپ وتىرعان 2026 جىلعى ازيا ويىندارىندا ول دجيۋ-دجيتسۋدان قازاقستان قۇراماسىنا تاعى ءبىر مەدال سىيلادى، دەپ حابارلايدى infohub.kz سايتى.
38 جاستاعى سپورتشى 63 كەلىگە دەيىنگى سالماق دارەجەسىندە سىنعا ءتۇستى. شيرەك فينالدا جەڭىلىس تاپقان سوڭ ول جۇبانىش راۋندىنا ءتۇسىپ، مەدال ءۇشىن بەلدەسۋگە دەيىن جەتتى. قولا جۇلدە ءۇشىن كەزدەسۋدە جۋراۆلەۆا يوردانيالىق ماييا يشاكاتتى 2:0 ەسەبىمەن جەڭدى.
قازاقستاندىق سپورتشى ازيادادا دجيۋ-دجيتسۋدان قاتارىنان ەكىنشى رەت تۇعىرعا كوتەرىلدى. حانچجوۋ-2022 ويىندارىندا دا ول قولا جۇلدە العان، ءبىراق ول كەزدە ۋرداباەۆا تەگىمەن ونەر كورسەتكەن. ال ينچحون-2014 ويىندارىندا سپورتشى دزيۋدودان (63 كەلىگە دەيىن) ءدال وسىنداي مەدال جەڭىپ العان.
وسى سالماق دارەجەسىندە ونەر كورسەتكەن تاعى ءبىر قازاقستاندىق اجار سالىكوۆا 1/8 فينالدا اياق الىپ، العاشقى بەلدەسۋدە-اق جەڭىلىس تاپتى.
وسىلايشا، ۇلتتىق قۇراما دجيۋ-دجيتسۋدان سوڭعى جارىس كۇنىندە ەكى مەدالمەن ەرەكشەلەندى. بۇعان دەيىن مەرەي قابدۋللايەۆ (85 كەلىگە دەيىن) كۇمىس جۇلدەگەر اتانعان بولاتىن.